काठमाडौं । मनोरञ्जन कर तिर्न फिल्म हलहरूले अटेरी गरेपछि काठमाडौं महानगरपालिकाले १५ दिने अल्टिमेटम दिएको छ । महानगरको राजस्व विभागले १७ भदौभित्र कर तिरी सक्न अल्टिमेटम दिएको हो ।
महानगरभित्र ४२ फिल्म हल छन् । गत आर्थिक वर्षमा चार फिल्म हलले मात्रै कर तिरेको विभागले जनाएको छ । ‘टिकट बिक्रीसँगै संकलन भएको शुल्क पनि महानगरमा नबुझाएपछि हामीले ताकेता गरेका हौँ,’ विभागका प्रमुख नुरनिधि न्यौपानेले भने, ‘गत वर्ष चारवटा हलले मात्रै मनोरञ्जनबापतको शुल्क बुझाए । जसबाट १९ लाख रुपैयाँ संकलन भएको थियो ।’
प्रदेश ३ को आर्थिक ऐन २०७६ को व्यवस्थाबमोजिम फिल्म हलले चलचित्र प्रदर्शन गर्दा प्रतिटिकट बिक्रीमा मनोरञ्जन करबापत लिएको ५ प्रतिशतले हुन आउने रकम अर्को महिनाको २५ गतेभित्र स्थानीय सरकारलाई बुझाउनुपर्छ ।
२०७६ भदौ ३ गते प्रकाशित
वि.सं.२०७६ भदौ ३ मंगलवार ०९:०३ मा प्रकाशित
