काठमाडौं । मेलम्ची खानेपानी आयोजनाको बाँकी कामको जिम्मा चिनियाँ कम्पनी सिनो हाइड्रोले पाएको छ ।
आयोजना प्रमुख सूर्यराज कँडेलले बाँकी काम सम्पन्न गर्न सिनो हाइड्रोलाई १ अर्ब ६५ करोड रुपैयाँमा ठेक्का दिने तय भएको जानकारी दिनुभयो ।
ऋणदाता एसियाली विकास बैक (एडीबी) बाट स्वीकृत पाएपश्चात मेलम्ची खानेपानी विकास समितिले बैक ग्यारेन्टी सहित प्रकिया पुर्याएर सम्झौता गर्न आउन सिनो हाइड्रोलाई पत्र पठाएको छ ।
इटालियन ठेकेदार सिएमसी ठेक्का पाएर बीचमै अधुरै काम छाडेर भागेपछि बाँकी काम सम्पन्न गर्न पुनः बोलपत्र आव्हान गरेर सिनो हाइड्रोलाई छनौट गरिएको हो ।
सिनो हाइड्रोलेले अब बाँध (हेडवक्र्स) र सुरुङ (टनेल) फिनिसिङको जिम्मा पाएको हो । विभिन्न जलविद्युत आयोजनाहरुको निर्माणमा संलग्न रहेको उक्त कम्पनी अनुभवी समेत हो ।
वोलपत्र अनुसार २८ दिनभित्र सम्झौता गरेर एक महिनाभित्र ठेकदार कम्पनीले काम सुरु गरिसक्नुपर्छ । तामाकोशी हाईड्रोपावरको काम सकेर मेसिनरी र जनशक्ति सहित तयार अवस्थामा रहेकाले दशैं अघि नै काम सुरु गर्ने तयारी सिनोले गरेको छ ।
यसअघि अनुमानित भन्दा २९ प्रतिशत कम (९० करोड) लागतमा बाँध र १५ प्रतिशत कम लागतमा सुरुङ निर्माण (७५ करोड) सम्पन्न गर्ने गरी कबोल गरेको सिनो हाइड्रोलाई आयोजनाको मुल्यांकन समितिले उत्कृष्ट ठहर गर्दै स्वीकृतिका लागि एडीबी पठाएको थियो ।
१२ अगष्टमा एडीबीले चिनियाँ कम्पनीबाट काम गराउन स्वीकृति दिएको हो । आयोजनाले १३ अगष्टमा निर्माण व्यवसायी छनोटमा चित्त नबुझेमा सात दिन उजुरी गर्न भन्दै सार्वजनिक सूचना निकालेको थियो । सोमबारसम्म कुनै उजुरी नपरेपछि आयोजनाले चिनियाँ कम्पनीलाई सम्झौताका लागि बोलाएको हो।
२०७६ भदौ ४ गते प्रकाशित
वि.सं.२०७६ भदौ ४ बुधवार १२:४४ मा प्रकाशित
