ललितपुर । शनिवार साँझ नेपालगन्ज विमानस्थलमा संस्कृति, पर्यटन तथा नागरिक उड्डयनमन्त्री योगेश भट्टराईमाथि दुर्व्यवहार गर्ने ज्ञानबहादुर शाही भन्ने ज्ञानेन्द्र शाहीलाई ललितपुर प्रहरीले पक्राउ गरेको छ ।
शाहीलाई नै सुरक्षा दिएका प्रहरीमाथि उल्टै अभद्र व्यवहार गरेको भन्दै प्रहरीले उनलाई हिरासतमा राखेको हो । शाहीले आइतबार अपरान्ह ललितपुरको पुल्चोकमा ’नेपालका लागि नेपाली’ नामक अभियानको कार्यालयमा पत्रकार सम्मेलन गर्दै गर्दा झडप भएपछी सुरक्षा दिन गएको प्रहरीमाथी अभद्र व्यबहार गरेको प्रहरीको आरोप छ ।
ललितपुर परिसरको मुद्दा शाखाका डिएसपी सन्तोष तामाङका अनुसार प्रहरी टोलीमाथि अभद्र गरेपछि उनलाई जरुरी पक्राउ पुर्जी दिएर हिरासतमा लिइएको हो ।
शनिवार साँझ नेपालगन्ज विमानस्थलमा संस्कृति, पर्यटन तथा नागरिक उड्डयनमन्त्री योगेश भट्टराईमाथि दुव्र्यवहार गर्ने शाहीले शनिबार भएको घटनाबारे जानकारी दिने भन्दै आइतबार ललितपुरको पुल्चोकमा पत्रकार सम्मेलन गरेका थिए ।
पत्रकार सम्मेलनमा खास पत्रकारहरुको भन्दा पनि युटुबरहरुको धेरै उपस्थिति थियो । पत्रकार सम्मेलनमा शाहीले प्रश्नको उत्तर दिन नसक्ने स्थिति भएपछि युटुबर र शाही समर्थकबीच झडप भएको थियो ।
पक्राउ परेका शाहीमाथि गैरसैनिक हवाई उडान (सिभिल एभियसन) ऐन २०१५ को ९ (क) १ को घ बमोजिमको कसुर गरेको भन्दै अर्को छुट्टै मुद्दा समेत लगाउने तयारी प्रहरीले गरेको छ ।
उक्त मुद्दामा १० देखि २० बर्षसम्म कैद र आरोपीको सम्पूर्ण सम्पत्ति जफत हुने कानुनी ब्यबस्था छ । शाही लगायतको समूहले मन्त्री भट्टराईमाथि नेपालगञ्जबाट काठमाडौं आउने क्रममा विमानभित्रै दुर्व्यवहार गरेका थिए ।
मन्त्री भट्टराई कैलालीमा आयोजित डल्फिन महोत्सवमा सहभागी भएर काठमाडौं आउने क्रममा विमान डिले गरेको आरोपमा शाहीको समूहले उनीमाथि आक्रमण प्रयास गरेको थियो ।
२०७६ भदौ ३० गते प्रकाशित
वि.सं.२०७६ भदौ ३० सोमवार ०९:१६ मा प्रकाशित
