काठमाडौं । सत्तारुढ नेकपाकी सांसद पम्फा भुसालले गाडी चालक र कार्यालय सहयोगीलाई स्थायी गर्नुपर्ने बताउनुभएको छ । कम तलवमा काम गर्ने गाडी चालक र कार्यालय सहयोगीहरुलाई स्थायी गर्नुपर्ने कानुनी व्यवस्था गर्नुपर्ने उनले प्रस्ताव गर्नुभएको हो ।
संसदको राज्य व्यवस्था तथा सुशासन समितिको बैठकमा सोमबार माथिल्लो ओहोदाका कर्मचारी स्थायी गर्ने ‘संघीय निजामती सेवाको गठन, संचालन र सेवाको सर्तसम्बन्धि विधेयक’मा राखिएको प्रावधानमाथिको छलफलमा उहाँले तल्लो तहका कर्मचारीलाई अन्याय गर्न नहुने बताउनुभयो ।
उहाँले कम्युटर अपरेटरलाई पनि करारमा राख्न नहुने धारणा राख्नुभयो । त्यसैगरी प्रमुख प्रतिपक्ष दल कांग्रेस सांसद दिलेन्द्रप्रसाद बडुले पनि अस्थायी र करारमा कर्मचारी राख्ने कानुनी व्यवस्था अनुपयुक्त भएको बताउनुभयो ।
अस्थायी प्रकृतिका कार्यालयमा भने प्रयोजन सकिएपछि कर्मचारी विदाई गर्ने कानुनी व्यवस्था गर्नुपर्ने उहाँको धारणा थियो । सबै कर्मचारी स्थायी भएपछि राज्यले दिने सेवा र सुविधा पनि समान हुनुपर्ने माग उहाँले राख्नुभयो ।
२०७६ भदौ ३० गते प्रकाशित
वि.सं.२०७६ भदौ ३० सोमवार १७:२२ मा प्रकाशित