काठमाडौं । निजामती कर्मचारीको उमेर हद कार्य–सम्पादनको आधारमा किस्ताबन्दीमा दुई वर्षसम्म बढाउने तयारी भएको छ ।
व्यवस्थापिका सविचाराधीन संघीय निजामती सेवा ऐनमा कर्मचारीको उमेर हद किस्ताबन्दीमा बढाउँदै ५८ बाट ६० पुर्याउने सहमति जुटाउने तयारी भएको हो । तर दुई वर्षसम्मको उमेर हद कर्मचारीको कार्यसम्पादनको आधारमा मात्रै थप हुनेछ ।
संसद्को राज्य व्यवस्था तथा सुशासन समितिमा छलफलमै रहेको संघीय निजामती सेवा विधेयकमा निजामती कर्मचारीको कार्य–सम्पादनका आधारमा उमेर हद बढाउने विषयमा सहमति जुटेको हो ।
‘उमेर हद बढाउने कि नबढाउने भन्नेमै विवाद थियो, सरकारले अहिले उमेर हदको विषयमा नयाँ मोडल प्रस्तुत गरेको छ,’ समितिका एक सदस्यले भने, ‘अब यसैमा लगभग सहमतिनजिक पुगिसकेको अवस्था हो।’
यसअघि संघीय मामिला तथा सामान्य प्रशासन मन्त्रालयले मन्त्रिपरिषद पठाएको मस्यौदामा कर्मचारीको उमेर हद ६० वर्ष कायम राखिएको थियो ।
त्यसपछि मन्त्रिपरिषद्ले थप तयारी गर्नू भन्दै मस्यौदा मन्त्रालयमै फर्कायो, त्यसबेला उमेर हद ५८ राखियो, सोही अनुसार संसदमा पेस पनि भयो ।
अहिले व्यवस्थापिका संसदको वेभसाइटमा राखिएको विधेयकको वर्तमान अवस्थामा हेर्दा कर्मचारीको उमेर हद ५८ नै राखिएको छ । तर यसैबीचमा मन्त्रालयले पुनः दुई वर्ष किस्ताबन्दीमा उमेर हद थप गर्ने प्रस्ताव ल्याएको हो ।
अहिले सरकारी कर्मचारी मणि हराएको नागझैं भएका छन, सेवाग्राहीलाई देखेपछि कर्मचारीले पिठ्युँ फर्काएर बस्ने प्रवृत्ति देखिएको छ ।
हाल सहमतिनजिक पुगिएको उक्त व्यवस्था अनुसार निजामती कर्मचारीको आधारभूत उमेर हद ५८ र थप दुई वर्ष कार्य–सम्पादनका आधारमा थप गरेर ६० वर्ष सम्म पुर्याउन सक्ने भनिएको छ ।
तर अहिले उमेरका कारण अवकाशनजिक पुगेकाको हकमा भने नयाँ व्यवस्था गरिने भएको छ । नागरिक दैनिकबाट
२०७६ असोज ०२ गते प्रकाशित
वि.सं.२०७६ असोज २ बिहीवार ०८:२८ मा प्रकाशित
