काठमाडौं । कैलालीको भजनी नगरपालिका–४ खैलाडस्थित राष्ट्रिय माविका लागि खरिद गरिएका कम्प्युटर र प्रोजेक्टर शिक्षकको घरमा भेटिएको छ ।
२०७५ साउनमा खरिद गरिएका शैक्षिक सामग्री विद्यालयमा नभएपछि खोजबिन गर्दा एउटा कम्प्युटर पूर्वप्रधानाध्यापक बालासिंह खत्री र प्रोजेक्टर प्लस टु संयोजक मथुरा चौधरीको घरमा भेटिएको हो ।
खरिद गरिएको फोटोकपी मेसिन र इन्भर्टर पनि विद्यालयमा छैन, तर कसले लगेको पत्तो लाग्न सकेको छैन । खत्री प्रअ छँदा विद्यालयले ६ कम्प्युटर, एक ल्यापटप, एक फोटोकपी मेसिन, एक प्रोजेक्टर र एक इन्भर्टर गरी ६ लाखका सामग्री खरिद गरेको कोटेसन र बिल भर्पाईमा देखिन्छ ।
तर, चार लाख २० हजार मूल्यका सामग्री विद्यालयमा नभएको हालका प्रधानाध्यापक सुरेश कठरियाले बताउनुभयो । ‘म गत १३ जेठमा मात्रै हाजिर भएको हुँ, विद्यालयको खातापाता हेर्दा जता पनि अनियमितता देखिन्छ ।
विद्यालयले कोटेसन बनाएको र बिलसमेत भर्पाई भइसकेका सामान छैनन् । कहीँ बक्यौता देखिन्छ, कहीँ पेस्की बेरुजु देखिन्छ,’ प्रअ कठरियाले भन्नुभयो, ‘खोजबिन गर्दा एक थान कम्प्युटर पूर्वप्रअ बालासिंह खत्रीको घरमा र प्रोजेक्टर प्लस टु संयोजक मथुरा चौधरीको घरमा भेटियो । इन्भर्टर र फोटोकपी मेसिन अझै फेला परेको छैन ।’ भेटिएका सामग्री फिर्ता गर्न ताकेता गरिरहेको उहाँले बताउनुभयो ।
पूर्वप्रअ खत्रीले पूर्वलेखापाल जगदीशकुमार महतोसँग मिलेर आर्थिक अनियमितता गरेको शिक्षक बाधुराम चौधरीको आरोप छ । ‘लेखापाल महतो प्रअको आफन्तजस्तै थिए । मिलेर अनियमितता गरे,’ चौधरीले भन्नुभयो ।
विद्यालयले टीकापुरस्थित एभरेस्ट कम्प्युटर सेल्स एन्ड सप्लायर्सबाट १० साउन ०७५ मा ती सामग्री खरिद गरेको बिल विद्यालयमा पेस भएको छ । विद्यालयको नगद ठेली रसिदमा हस्ताक्षरविना विद्यार्थीसँग पैसा उठाएकोसमेत भेटिएको प्रअ कठरियाले बताउनुभयो ।
विद्यार्थीबाट पैसा लिएको देखिए पनि हरहिसाब नराखिएको उनको भनाइ छ । जगदीशकुमार महतोभन्दा पहिलाका लेखापाल वीरबहादुर चौधरीले पनि ३९ हजार हिनामिना गरेको तीन वर्षअघिको सामाजिक लेखापरीक्षण प्रतिवेदनमा उल्लेख छ ।
विद्यालयलको अहिलेसम्म २२ लाख १४ हजार बक्यौता र ११ लाख ६५ हजार पेस्की असुली गर्न बाँकी छ । विद्यालयको निर्माणाधीन २४ लाखको चारकोठे भवन र आठ लाखको दुईकोठे शौचालयमा पनि आर्थिक अनियमितता भएको भन्दै गत वर्ष उजुरी परेको छ ।- नयाँ पत्रिकाबाट
२०७६ असोज १३ गते प्रकाशित
वि.सं.२०७६ असोज १३ सोमवार ०९:४२ मा प्रकाशित
