काठमाडौं । शिव श्री हाइड्रोपावरको आइपीओमा मंगलबार (कात्तिक ५ गते) सम्ममा ६ करोड ९३ लाख ९७ हजार रुपैयाँ बराबरको आवेदन परेको छ ।
बिक्री प्रबन्धक सिद्धार्थ क्यापिटलका अनुसार १४ हजार ४१९ आवेदकबाट ६ लाख ९३ हजार ९७० कित्ताको लागि आवेदन परेको छ । अब २६ लाख ५७ हजार १७० कित्तामा आवेदन पर्न बाँकी रहेको देखिन्छ ।
पछिल्लो ५ दिनभित्र यो आइपीओमा ८२ हजार ९७० कित्तामा मात्र आवेदन परेको छ । असोज ३० गतेसम्म ६ लाख ११ हजार कित्ताका लागि मात्र आवेदन परेको थियो ।
यस आइपीओमा असोज २५ गतेबाट संस्थाहरुले पनि आवेदन दिन पाउने व्यवस्था गरिएको छ । शिव श्री हाइड्रोपावरले असोज १६ गतेबाट ३३ करोड ५१ लाख १४ हजार रुपैयाँ बराबरको आइपीओ बिक्री खुला गरेको हो ।
कम्पनीले यसअघि आयोजना प्रभावित स्थानीयले नकिनेको ११ लाख ३६ हजार ५४० कित्ता र सर्वसाधारणलाई छुट्याइएको २२ लाख १४ हजार ६ सय कित्ता गरी कुल ३३ लाख ५१ हजार १४० कित्ता आइपीओ बिक्री खुला गरेको हो ।
यसमध्ये २ लाख ६८ हजार ०९१ कित्ता कर्मचारीलाई सुरक्षित गरिएको छ । चालु आर्थिक वर्षमा शिव श्री आइपीओ बिक्री गर्ने पहिलो कम्पनी हो । यो आइपीओ अब कात्तिक १५ गतेसम्म भर्न सकिनेछ ।
यसमा न्यूनतम १० कित्तादेखि अधिकतम १० लाख कित्तासम्मका लागि आवेदन दिन पाइनेछ ।
२०७६ कात्तिक ०६ गते प्रकाशित
वि.सं.२०७६ कात्तिक ६ बुधवार ०९:२० मा प्रकाशित