काठमाडौँ । लागु औषध नियन्त्रण व्युरोले ६ करोड वरावरको लागूऔषधसहित पाँचजनालाई पक्राउ गरेको छ । ठूलो परिणाममा लागूऔषध कोकिनसहित दुई विदेशी युवती र मेथाफेटामाइनको कारोवारमा संलग्न भएको भन्दै गिरोहलाई काठमाडौँको ठमेलबाट पक्राउ गरिएको हो ।प्रहरीले ५४ किलोग्राम मेथाफेटामाइन अस्ट्रेलिया पठाएको अभियोगमा तीनजनालाई ठमेलबाट पक्राउ गरि सार्वजनिक गरेको हो ।
अन्तर्राष्ट्रिय गिरोहका प्रोफाइलिङ गरी निगरानी गरिरहेको व्युरोले क्षेत्रपाटीवाट उनीहरुलाई एकैसाथ नियन्त्रणमा लिएको हो । अति महँगो मानिने लागूऔषध कोकिनसहित सोमवार व्युरोले ३७ वर्षीय अफ्रिकी नागरिक पथोनी सेन र नागाल्याण्ड भारतका ४१ वर्षीय मर्सीलाई २ दशमलव ७ सय २२ ग्राम कोकिनसहित पक्राउ गरेको हो । तिनीहरुले ट्रेसिमी स्याम्पोको वोतलमा कोकिन लुकाइराखेको प्रहरीको भनाई छ । तिनीहरु दक्षिण अफ्रिाकाको राजधानी जोहन्सवर्गवाट दुवई हुदै व्राजिल पुगेर पुनः दुवई हुदै फ्लाई दुवईको विमानमा चैत १४ गते नेपाल आइपुगेको देखिएको छ । अभियुक्त युवतीहरु भारत, फिलिपिन्स हुदै युरोपियन मुलुकहरुमा कोकिनको तस्करीमा संलग्न हुदै आएको अनुसन्धानवाट खुलेको व्युरोले जनाएको छ ।
त्यस्तै, ५४ केजी अवैध मेथाफेटामाइन अष्ट्रेलिया पठाउने कार्यमा संलग्न भएको अभियोगमा तीन जना युवालाई पनि व्युरोले नियन्त्रणमा लिएको छ । व्युरोले सिन्धुपाल्चोक वतासेका मनिष श्रेष्ठ, धादिङका विक्रम लामिछाने र नुवाकोटका होमवहादुर तामाङलाई सोमवार पत्रकार सम्मेलन गरी सार्वजनिक गरेको हो । गत जनवरीमा चीनको गोन्जाउवाट समुद्री मार्ग हुदै घर सजावटका सामान भनेर अष्ट्रेलिया पुगेका मेथाफेटामाइनसहित अष्ट्रेलियन नागरिक रेमण्ड जोन मार्सडेन र भुपेन्द्र तामाङ पक्राउ परेसँगै प्रहरीले अनुसन्धान गरिरहेको थियो । अभियुक्त होमहादुर तामाङले प्रतिव्यक्ति डेढ लाख रुपैया दिएर ओसारपोसारमा संलग्न गराएको अनुसन्धानवाट खुलेको छ ।
लागुऔषध कोकिनको ओसारपसारमा दक्षिण अफ्रिका, नाईजेरिया, ब्राजिल, भारत, फिलिपिन्स, इटाली, दुवई, नेदरल्याण्ड्सलगायत मुलुकहरुमा गिरोह सक्रिय रहेको र नेपाललाई ट्रान्जिट पोइन्टका रुपमा प्रयोग गरिरहेको खुल्न आएको छ । व्युरोले यसैलाई मध्यनजर गरी क्रियाशिल समूहको प्रोफाइलिङ र विेशेष निगरानी गर्ने क्रममा उनीहरु पक्राउ परेका हुन् ।
१६ चैत २०७२ / १०:०५
वि.सं.२०७२ चैत १६ मंगलवार १०:०८ मा प्रकाशित
