काठमाडौं । नेपाली पुँजी बजारको अहिलेसम्मकै ठूलो आइपीओ आउने भएको छ । नेपाल इन्फ्रास्ट्रक्चर बैंकले ८ करोड कित्ता आइपीओ ल्याउने भएको छ ।
मंसिर २९ गते साधारण सभा डाकेको यस बैंकले ८ अर्ब रुपैयाँ बराबरको ८ करोड कित्ता आइपीओ ल्याउने प्रस्ताव पेश गर्दैछ । सभाबाट पारित भएमा बैंकले नेपाली धितोपत्र बोर्डमा आवेदन दिने प्रक्रिया अघि बढाउनेछ । यो नेपाली पुँजी बजारको अहिलेसम्मकै ठूलो आइपीओ हुनेछ ।
सभा र्या्डिसन होटल, लाजिम्पाटमा दिउँसो ४ बजेदेखि सुरु हुनेछ । आइपीओ जारी प्रस्तावसँगै बैंकको चुक्ता पुँजी पनि १२ अर्ब बाट बढाएर २० अर्ब पुर्याउने एजेन्डा हुनेछ ।
सोही अनुसार बैंकको प्रबन्धपत्र संशोधन गरिने एजेन्डा पनि छ । संस्थापक समूहबाट प्रतिधित्व गर्ने सञ्चालकहरुको निर्वाचन गर्ने प्रस्ताव पनि छ ।
आर्थिक वर्ष २०७४/७५ र २०७५/७६ को नाफा नोक्सान सम्बन्धी हिसाबकिताबका सम्बन्धमा पनि छलफल हुनेछ । आर्थिक वर्ष २०७६/७७ का लागि लेखापरीक्षक नियुक्ति र पारिश्रमिक निर्धारण गर्ने अर्को एजेन्डा पनि छ ।
यस बैंकले हाल कास्की जिल्लाको माछापुच्छ्रे र सर्दीखोला गाउँपालिकामा अवस्थित ३२ मेगावाट उत्पादन क्षमता भएको करुवा सेती हाइड्रोपावर परियोजनामा लगानी गरेको छ ।
बैंकले चालु आर्थिक वर्षको पहिलो त्रैमासमा १८ करोड ५८ लाख रुपैयाँ नाफा कमाएको छ । हाल यसको चुक्ता पुँजी १२ अर्ब रुपैयाँ रिजर्भ कोषमा ९७ करोड ४८ लाख रुपैयाँ रहेको छ । यसको प्रतिसेयर आम्दानी ६ रुपैयाँ २० पैसा रहेको छ ।
२०७६ मंसिर ०४ गते प्रकाशित
वि.सं.२०७६ मंसिर ४ बुधवार १०:४७ मा प्रकाशित
