२०७६ मंसिर ०६ गते प्रकाशित
काठमाडौं । विश्वका २६ मुलुकका अंग्रेजी शिक्षक ललितपुरमा भेला भएका छन्। नेपाल अंग्रेजी भाषा शिक्षक संघ (नेल्टा) र अंग्रेजी भाषा शिक्षकहरूको अन्तर्राष्ट्रिय संघ टिसोल (अमेरिका) ले आयोजना गरेको क्षेत्रीय सम्मेलनमा सहभागी हुन उनीहरू नेपाल आएका हुन्।
भेलामा १ हजार अंग्रेजी शिक्षक सम्मिलित छन्। सहभागीले अंग्रेजी शिक्षाको विकाससँग सम्बन्धित रहेर कार्यपत्र प्रस्तुत गरेका छन्।
सम्मेलनमा अंग्रेजी कसरी पढाउने ? कस्तो अंग्रेजी शिक्षा आवश्यक छ ? भाषाको माध्यमबाट देशको विकास कसरी गर्न सकिन्छ भन्ने विषयमा ज्ञान पाएको नेपालका शिक्षकले बताए।
‘विश्वभरबाट अंग्रेजी शिक्षकहरू आउनुभएको छ। एक अर्को देशमा अंग्रेजी कसरी पढाइन्छ ? राम्रो शिक्षक बन्ने आइडिया सम्मेलनबाट थाहा पाएँ,’ सम्मेलनमा काभ्रेबाट सभागिता जनाएकी कल्पना थापाले भनिन्।
‘विश्वमा अंग्रेजीको प्राक्टिक्स कस्तो भइरहेको छ ? नेपालले अंग्रेजीमा सुधार गर्नुपर्ने विषयबारे सम्मेलनबाट सिक्न पाइयो’, अर्का सहभागी अग्नी ज्ञवालीले भने।
पहिलो दिन बुधबार नेल्टा सिम्पोजियम भएको नेल्टाका उपाध्यक्ष जयराम खनालले जानकारी दिए। दोस्रो दिन बिहीबार सम्मेलनको उद्घाटन संस्कृति पर्यटन तथा नागरिक उड्डयन मन्त्री योगेश भट्टराईले गरेका छन्। सम्मेलनमा शनिबारसम्म आठवटा की–नोट, १७ वटा प्लेनरी तथा २ सयभन्दा बढी कार्यपत्र प्रस्तुत गरिनेछ।
वि.सं.२०७६ मंसिर ६ शुक्रवार १२:३४ मा प्रकाशित
