काठमाडौं । साताको अन्तिम दिन सेयर बजार २६ अंकले बढेको छ । बिहीबार सेयर बजार बढेर १ हजार ३१० अंकमा पुगेको छ ।
लामो समयपछि बजारले १ हजार ३०० अंक पार गरेको हो । दुई सातादेखि उकालो लागेको बजारले बिहीबार पनि निरन्तरता पाएको छ ।
बजार बढेसंगै कारोबार रकममा पनि वृद्धि भएको छ । बिहीबार १ अर्ब ६९ करोड ९९ लाख रुपैयाँ बराबरको ५० लाख २५ हजार ५६३ कित्ता सेयर किनबेच भएको छ ।
हिमालयन डिस्टिलरी लिमिटेड र शिवम सिमेन्ट लिमिटेडको सबैभन्दा बढी कारोबार भएको छ । यी दुई कम्पनीले कारोबार रकम बढाएका छन ।
हिमालयन डिस्टिलरीको प्रतिकित्ता १ हजार २६८ रुपैयाँमा १४ करोड ३८ लाख ९९ हजार रुपैयाँको सेयर कारोबार भएको छ ।
शिवमको ५२४ रुपैयाँमा १३ करोड ५९ लाख ६० हजार रुपैयाँको सेयर किनबेच भएको छ । यस्तै एनआईसी एसिया बैंकको ४७५ रुपैयाँमा ६ करोड ८३ लाख रुपैयाँको सेयर किनबेच भएको छ ।
बिहीबार व्यापार, बैंक तथा वित्त, बीमा, जलविद्युत, होटल, उत्पादनमुलक र म्युचअल फण्डको परिसुचक बढेको छ ।
एनआईबीएल प्रगति फण्ड, ग्लोबल आईएई लघुवित्त, आईसीएफसी फाइनान्स, तिनाउँ मिसन डेभलपमेन्ट बैंक र मल्टिपर्पस फाइनान्सका लगानीकर्ताले कमाएका छन ।
२०७६ माघ ०२ गते प्रकाशित
वि.सं.२०७६ माघ २ बिहीवार १५:११ मा प्रकाशित