काठमाडौं । बीमा कम्पनीहरूले अब आफूले प्रयोग गरेका सूचना प्रविधिहरूको साइबर सुरक्षा बीमा गर्नुपर्ने भएको छ ।
बीमा समितिले ‘बीमकको सूचना प्रविधि मार्गदर्शन, २०७६’ लागू गर्न लागेको छ, उक्त मार्गदर्शनको मस्यौदामा यस्तो व्यवस्था गरिएको हो ।
उक्त मार्गदर्शन जारी भएपछि बीमा कम्पनीहरूले कुनै पनि निर्जीवन बीमा कम्पनीमा साइबर सुरक्षा बीमा गर्नुपर्ने छ । नेपालमा सञ्चालित सबै पुनर्बीमा, निर्जीवन बीमा र जीवन बीमा कम्पनीले सूचना प्रविधिको बीमा गराउनुपर्ने मस्यौदामा उल्लेख छ ।
यद्यपि, बीमा कम्पनीले आफ्नै कम्पनीमा यस्तो बीमा गर्न पाउने छैनन् । साथै, नेपालभन्दा बाहिरको कम्पनीमा पनि यस्तो बीमा गर्न नपाइने मस्यौदामा उल्लेख छ ।
पछिल्लो समय नेपाली बैंकहरू साइबर हमलाको शिकार बन्दै गएको सन्दर्भमा बीमा कम्पनी पनि यसको जोखिममा पर्न सक्ने भएकाले यस्तो नीति ल्याउन लागिएको हो ।
मस्यौदामा उल्लेख गरिएअनुसार कम्पनीले सूचना प्रविधिका पूर्वाधार र त्यस सम्बद्ध कर्मचारीको तोकिएको मापदण्डअनुसार बीमा गर्नुपर्ने हुन्छ । आर्थिक अभिायनमा समाचार छ ।
वि.सं.२०७६ माघ २६ आइतवार ०६:४७ मा प्रकाशित