काठमाडौं । एनएमबी बैंकले चालु आर्थिक वर्षको दोस्रो त्रैमाशमा ४७.४० प्रतिशतले नाफा बढाएको छ । चालु आर्थिक वर्षको पुससम्म बैंकले १ अर्ब ६३ करोड ६० लाख रुपैयाँ खुदनाफा गरेको छ ।
गत वर्षको सोही अवधिमा बैंकले १ अर्ब १० करोड ९९ लाख रुपैयाँ खुदनाफा गरेको थियो । गत वर्षको तुलनामा चालु आर्थिक वर्षमा बैंकले ५२ करोड ६१ लाख रुपैयाँ खुदनाफा बढाएको छ । बैंकको प्रतिसेयर आम्दानी ३० रुपैयाँ ४० पैसा छ ।
६ महिनामा बढेको नाफाबाट बैंकले सेयरधनीलाई १ अर्ब ११ करोड ६५ लाख रुपैयाँ लाभांश बाँड्ने देखिएको छ । ब्याज आम्दानी र स्प्रेडले गर्दा बैंकले नाफा बढाएको हो ।
बैंकले ६ महिनामा २ अर्ब ७३ करोड ४३ लाख रुपैयाँ खुदब्याज आम्दानी गरेको छ । गत वर्षको ६ महिनामा बैंकले २ अर्ब रुपैयाँ ब्याज आम्दानी गरेको थियो ।
बैंकको निष्क्रिय कर्जा बढेर १.९६, निक्षेप लागत ७.७०, सीसीडी ७७.५५, आधारदर १०.१२ र स्प्रेड ५ प्रतिशत छ । बैंकको सञ्चित कोषमा ५ अर्ब २१ करोड रुपैयाँ छ ।
वि.सं.२०७६ माघ २६ आइतवार ०९:२३ मा प्रकाशित
