काठमाडौं । नेपाल पुनर्बीमा कम्पनीले आईपीओको बाँडफाँट बुधवारनै गर्ने भएको छ । यसअघि शुक्रवार बाँडफाँट गर्ने तयारी गरेको कम्पनीले मंगलवार भएको छलफल पछि बुधवार नै बाँडफाँट गर्ने निर्णय गरेको कम्पनीका प्रमुख कार्यकारी अधिकृत शंकर कुमार रायामाझीले जानकारी दिएका छन् ।
आईपीओको बाँडफाँट कम्पनीको विक्री प्रबन्धक आरबीबी मर्चेण्ट एण्ड बैंकिङको कार्यालयमा बिहान ७.३० बजे हुनेछ । उक्त आईपीओमा सर्वसाधारणको रू. ४ अर्बभन्दा बढी रकम रोक्का भएको छ ।
सर्वसाधारणले उक्त आईपीओमा रू. ५ अर्ब ७५ करोड ४७ लाख ३५ हजार बराबरको आवेदन दिएका छन् । जुन मागभन्दा रू. ४ अर्ब १५ करोड ४७ लाख ३५ हजार रकम बढी हो । विक्री प्रबन्धक आरबीबी मर्चेन्ट बैकिङले दिएको जानकारी अनुसार उक्त रकम बराबरको आईपीओका लागि ४ लाख ९ हजार ७२२ जनाले आवेदन दिएका छन् ।
विक्री बन्द भएको एक साताभित्र अर्थात् चैत १४ गते बाँडफाँट गर्ने कम्पनीको योजना रहेपनि कोरोना भाइरस संक्रमण रोकथाम तथा नियन्त्रणका लागि सरकारले चैत ११ गतेदेखि लकडाउन गरेसँगै बाँडफाँट प्रक्रिया रोकिएको थियो ।
सरकारी स्वामित्वको उक्त कम्पनीको नेटवर्थको आधारमा दोस्रो बजारमा राम्रो मूल्य पाउने र यसै वर्षदेखि लाभांश दिने विश्वासमा लगानीकर्ताहरु रहेको देखिन्छ । कम्पनीले आर्थिक वर्ष २०७७/८८ सम्ममा रू. १० अर्ब ५० करोड चुक्तापूँजी र्पुयाउने प्रक्षेपण गरेको छ ।
वि.सं.२०७६ चैत २५ मंगलवार १४:३७ मा प्रकाशित
