काठमाडौं । द्रूत परीक्षणको क्रममा शंकास्पद देखिएकी बागलुङकी एक वृद्धाको कोरोना संक्रमण परीक्षणको नतिजा ‘नेगेटिभ’ आएको छ ।
आइतबार काठेखोलाकी एक वृद्धाको कोरोना संक्रमण परीक्षण गर्दा शंकास्पद देखिएको थियो।
यद्यपि द्रूत परीक्षणले मात्रै पुष्टि गर्न नमिल्ने भएपछि ‘स्वाब’ पोखरा पठाइएको थियो। पोखराको पिसिआर मेसिनले उनको शंका निवारण गरिदिएको हो । पटकपटक गरिएको परीक्षणले शंकास्पद भनिएको वृद्धाको रिपोर्ट ‘नेगेटिभ’ देखाएको गण्डकी प्रदेशका स्वास्थ्य निर्देशक डा. विनोदविन्दु शर्माले जानकारी दिए । ‘हामीले भनेजस्तै भयो। हिजो शंकास्पद देखिएको हो। तर, कन्फर्म भने पिसिआर मेसिनले मात्रै गर्छ,’ उनले भने, ‘खुसीको कुरा नतिजा ‘नेगेटिभ’ आयो।’
केही समयअघि भारत तीर्थयात्रा गएर फर्किएका कारण उनी र उनको परिवारको स्वाब जाँच गरिएको थियो। अन्य सबैको ‘नेगेटिभ’ देखिएपनि उनको शंकास्पद भएपछि थप परीक्षण गरिएको हो।
वि.सं.२०७७ वैशाख १ सोमवार १७:२० मा प्रकाशित
