काठमाडौं । प्रधानमन्त्रीको सरकारी निवास बालुवाटारमा तीन घण्टादेखि मन्त्रिपरिषद्को बैठक चलिरहेको छ । विश्वव्यापी महामारीको रुपमा फैलिएको कोरोना भाइरस (कोभिड–१९) को संक्रमण, रोकथाम र लकडाउनको विषयमा निर्णय गर्न बसेको मन्त्रिपरिषद् बैठक लम्बिएको हो ।
मंगलबार बिहान ११:३० मा सुरु भएको बैठक अहिलेसम्म जारी छ। बैठकको प्रमुख एजेन्डा लकडाउनको समय थप गर्ने रहेको छ । यसअघि सरकारले वैशाख ३ गते राति १२ बजेदेखिसम्म लकडाउन गर्ने निर्णय गरेको थियो।
सरकारले चैत ११ गतेदेखि पटकपटक गरेर बुधबारसम्म लकडाउनको निर्णय गरेको हो । नेपालमा कोरोना संक्रमितको संख्या बढ्दै जाँदा लकडाउन अवधि थप गर्ने तयारी सरकारले गरेको छ। भारतमा आजैमात्र वैशाख २१ गतेसम्म लकडाउन गर्ने निर्णय गरेको छ ।
भारतसँग खुला सीमा रहेकाले भारतको निर्णयको प्रभाव नेपालमासमेत पर्ने देखिन्छ । अहिलेसम्म भारतमा कोरोना संक्रमितको संख्या १० हजार नाघेको छ भने मृतकको संख्या तीन सय नाघेको छ। नेपालमा अहिलेसम्म १४ जनामा संक्रमण पुष्टि भएको छ ।
वि.सं.२०७७ वैशाख २ मंगलवार १४:२४ मा प्रकाशित
