काठमाडौं । कोरोना भाइरस (कोभिड–१९) को संक्रमण फैलिन नदिने जिल्ला प्रशासन कार्यालय गुल्मीले यही जेठ ३२ गतेसम्म जिल्लामा निषेधाज्ञा जारी गरेको छ ।
प्रमुख जिल्ला अधिकारी भरतकुमार शर्माका अनुसार सरकारले जेठ ३२ गते मध्यरातसम्म लकडाउनको अवधि लम्ब्याएको हुँदा उक्त अवधिसम्म निषेधाज्ञा जारी रहने बताउनुभयो ।
निषेधाज्ञामा खाद्यान्न, तरकारी, फलफूल, दूध, पानी, औषधि बोक्ने मालबाहक गाडी र एम्बुलेन्सबाहेक मोटरसाइकलसहित अन्य सम्पूर्ण सवारीसाधनलाई पूर्ण रुपमा रोक लगाइएको छ ।
निषेधाज्ञा अवधिमा नागरिकलाई अत्यावश्यक काम बाहेक घरबाहिर ननिस्कन प्रशासनले आग्रहसमेत गरेको छ । अस्पताल, औषधि पसल र पेट्रोलपम्प भने जुनसुकै समय पनि खुला रहनेछन् ।
निषेधाज्ञा उल्लंघन भए नियन्त्रणमा लिएर संक्रमण रोग ऐन, २०२० अनुसार एक महिनादेखि ६ महिना कैद हुने निषेधाज्ञा जारी सम्बन्धी सूचनामा उल्लेख गरिएको छ ।
वि.सं.२०७७ जेठ २१ बुधवार १३:१८ मा प्रकाशित
