काठमाडौं । कोरोना भाइरस रोकथाम तथा नियन्त्रणका लागि अग्रपंत्तिमा ख्दै गर्दा हालसम्म ३२ जना प्रहरी अधिकृत तथा जवान कोरोना भाइरसबाट संक्रमित भएका छन् । त्यसमध्ये प्रदेश २ मा खटिएका मात्रै २२ जना रहेको प्रहरीले जनाएको छ ।
हिजो (शनिबार) थप दुई जना प्रहरीको रिपोर्ट पोजिटिभ आएसँगै संक्रमित प्रहरीको संख्या ३२ पुगेको हो । संक्रमितमध्ये १४ जना प्रहरी निको भएर होम क्वारेन्टाइनमा छन् । बाँकीको विभिन्न अस्पतालको आइसोलेसनमा राखेर उपचार भइरहेको प्रहरी प्रवक्ता निरजबहादुर शाहीले जानकारी दिएका छन् ।
प्रदेश–२ का प्रहरी प्रमुख डीआईजी धिरजप्रताप सिंहले आफ्नो क्षेत्रमा खटिएका प्रहरी निरीक्षकसहित २२ जनामा संक्रमण देखिएको र त्यसमध्ये ७ जना निको भएर ब्यारेकमै आराम गरिरहेका छन् । सिंहका अनुसार २ नम्बर प्रदेश सभामा खटिएका प्रहरीका ५ मर्यादापालक समेत संक्रमित छन् ।
यसअघि नेपाली सेना, सशस्त्र र राष्ट्रिय अनुसन्धान विभागका करिव एक दर्जन अधिकृत तथा जवानमा पनि संक्रमण देखिएकोमा उनीहरु उपचारपछि निको भएर होम क्वारेन्टाइनमा छन् ।
वि.सं.२०७७ जेठ २५ आइतवार ०८:२६ मा प्रकाशित
