काठमाडौं । वैशाखमा भएको दुई दिनको शेयर कारोबारमा २३ ओटा लघुवित्त कम्पनीको शेयरमूल्य घटेको छ । चैत महीनाको अन्तिम कारोबार दिनको तुलनामा वैशाख महीनामा ५० ओटा मध्ये २३ ओटा लघुवित्त कम्पनीहरुको शेयरमूल्य घटेको हो ।
लकडाउनका बीच दुई दिन खुलेको बजारमा कारोबारमा आएका सबै कम्पनीको शेयरमूल्य घटेको थियो । वैशाखमा ५० ओटा लघुवित्त कम्पनीहरुमध्ये २३ ओटा कम्पनीको मात्र शेयर कारोबार भएको छ ।
चैत महीनाको अन्तिम कारोबारको तुलनामा वैशाखको अन्तिम कारोबार दिन २३ ओटा कम्पनीमध्ये सबैभन्दा बढी जनउत्थान सामूदायिक लघुवित्तको शेयरमूल्य घटेको छ । उक्त कम्पनीको २५ प्रतिशत बोनस शेयर प्रयोजनका लागि नेपाल स्टक एक्सचेञ्ज(नेप्से) ले मूल्य समायोजनसमेत गरेको थियो ।
शेयर समायोजन मूल्यपछि पनि कम्पनीको शेयरमूल्य घटेको छ । २५ प्रतिशत बोनस पश्चात् नेप्सेले जनउत्थान सामूदायिक लघुवित्तको शेयरमूल्य प्रतिकित्ता रू. १ हजार ५१२ तोकेको थियो ।
नेप्सेले वैशाख ३० गते जनउत्थानको शेयरमूल्य समायोजन गरेको हो । चैतको तुलनामा वैशाखमा जन उत्थानको शेयरमूल्य रू.४६७ ले घटेको हो । मूल्य समायोजन अघि जनउत्थानको शेयरमूल्य प्रतिकित्ता रू. १ हजार ८९० थियो । मूल्य समायोजनले पनि जनउत्थानको शेयरमूल्य बढी घटेको देखिएको हो ।
जन उत्थानपछि एनएमबि माइक्रोफाइनान्सको शेयरमूल्य बढी घटेको छ । चैत महीनाको तुलनामा वैशाखमा उक्त कम्पनीको शेयरमूल्य रू. ८१ ले घटेको हो ।
उक्त कम्पनीले तेस्रो त्रैमासमा राम्रो व्यवसाय गरेको वित्तीय विवरण सार्वजनिक गरेको थियो । सामान्य परिस्थितिमा कम्पनीको आधारभूत तथा प्रावधिक पक्षहरु केलाएर लगानी गर्ने प्रबृत्ति भए पनि लकडाउनका समयमा लगानीकर्ताहरु अन्योलमा परेका थिए ।
गत वर्ष तेस्रो त्रैमाससम्म रू. ३ करोड ३२ लाख ८१ हजार खुद नाफा गरेको उक्त कम्पनीले लकडाउनको प्रभावका बीच पनि यस वर्ष सोही अवधिमा रू. ४ करोड ५९ लाख ७४ हजार खुद नाफा गरेको छ ।
चैतको तुलनामा वैशाखमा सबैभन्दा कम आरएसडीसी लघुवित्तको शेयरमूल्य घटेको छ । चैतको तुलनामा यस कम्पनीको शेयरमूल्य रू. ८ ले घटेको हो ।
धितोपत्रको दोस्रो बजारमा ५० ओटा लघुवित्त कम्पनीहरु सूचीकृत रहेका छन् । बजारमा सूचीकृत अन्य समूहको भन्दा लघुवित्त समूहमा धेरै कम्पनीहरु रहेका छन् ।
५० ओटा कम्पनीको १७ करोड ५२ लाख ७९ हजार २६५ कित्ता शेयर सूचीकृत रहेको छ । लघुवित्त समूहको कुल बजार पूँजीकरण रू. १ खर्ब ३२ अर्ब ८ हरोड २० लाख रहेको छ । (आर्थिक अभियानबाट साभार)
वि.सं.२०७७ जेठ २७ मंगलवार १४:१४ मा प्रकाशित
