वाशिङ्टन डीसी (अमेरिका) । चिनियाँ शर्ट भिडियो शेयरिङ एप टिकटकले अमेरिकामा १० हजार कर्मचारी भर्ती गर्ने भएको छ । अमेरिकी सरकारले एपमाथि प्रतिबन्ध लगाउने अड्कलबाजी बढिरहेकै बेलामा कम्पनीले यस्तो घोषणा गरेको हो ।
आगामी तीन वर्षमा कम्पनीले ती संख्यामा कर्मचारी भर्ती गर्ने भएको छ । टिकटकको लोकप्रियता बढेसँगै अमेरिकामा कर्मचारीको संख्या बढेको छ । यस वर्षको शुरुमा ५०० भन्दा कम रहेको कर्मचारी संख्या अहिले १ हजार ४०० आसपास पुगेको छ ।
‘सन् २०२० मा टिकटकले अमेरिकामा कार्यरत कर्मचारीको संख्या तेब्बर बनाउने छ, आगामी तीन वर्षमा भने थप १० हजार कर्मचारी भर्ती गर्ने योजना छ,’ कम्पनीका एक प्रवक्ताले भने ।
टिकटक चिनियाँ बहुराष्ट्रिय इन्टरनेट प्रविधि कम्पनी बाइटडान्सको सहायक कम्पनी हो । यस वर्षको अन्त्यसम्ममा कम्पनीमा कर्मचारी संख्या १ लाख पु¥याउने मार्च बाइट डान्सले भनेको थियो । चीनसँगको विवादहरु बढेसँगै अमेरिकाले भने चिनियाँ प्रविधि कम्पनीहरुमा कडाई गरिरहेको छ ।
अमेरिकाले पछिल्लो समय टिकटकमाथि निशाना साँधिरहेको छ । अमेरिकाले बाइटडान्सको म्युजिकल्ली एप खरीद सम्झौताबारे राष्ट्रिय सुरक्षा समीक्षा शुरु गरेको भन्दै गत नोभेम्बरमा अन्तरराष्ट्रिय समाचार संस्था रोयटर्सले समाचार छापेको थियो ।
बाइटडान्सले अमेरिकी एप म्युजिकल्ली किनेर यसलाई टिकटकमा गाँभेको थियो । अमेरिकाले एपमाथि कडाई गरेसँगै टिकटकले मख्यालयका लागि लन्डन, डब्लिन र सिंगापुरलगायत स्थानहरुबारे सोचिरहेको समाचार बाहिर आएका थिए । -एजेन्सी
वि.सं.२०७७ साउन ७ बुधवार १६:५७ मा प्रकाशित
