काठमाडौं । सम्पूर्ण स्वास्थ्य सुरक्षाको पालना गरी भीडभाड नहुने तथा दूरी कायम गरेर कार्यालय समयमा बैंक तथा वित्तीय संस्थाका सबै शाखा कार्यालय खोल्न नेपाल राष्ट्र बैंकले निर्देशन दिएको छ ।
केन्द्रीय बैंकले आज बैंक तथा वित्तीय संस्थालाई परिपत्र गर्दै ‘सिफ्ट सिस्टम’हटाउन भनेको छ। उक्त निर्देशनपछि विगतको जस्तै नियमितरूपमा बैंक तथा वित्तीय संस्थाका शाखा आठ घण्टा नै सञ्चालन गर्नुपर्ने हुन्छ ।
कोरोनाको सङ्क्रमण बढेको भन्दै गत चैत ११ गतेदेखि सरकारले लकडाउन गरेपछि बैंक तथा वित्तीय संस्थाले सीमित संख्याका शाखा मात्रै सीमित समयका लागि सञ्चालन गरेका थिए ।
यस्तै पछिल्ला दिनमा उनीहरूले सिफ्ट प्रणालीमा आफ्ना शाखा सञ्चालन गरेका थिए। बैंकिङ कारोबारको समयसम्म नियमितरूपमा बैंक तथा वित्तीय संस्थाका शाखा खोलेर सेवाग्राहीलाई सेवा दिन बैंकले परिपत्रमा उल्लेख गरेको छ ।
केन्द्रीय बैंकले स्वास्थ्यसम्बन्धी मापदण्डको पूर्ण परिपालना गर्न, कार्यालयमा भीडभाड कम हुने वातावरण बनाउनसमेत निर्देशन दिएको छ । यस्तै राष्ट्र बैंकले विद्युतीय कारोबारलाई समेत प्रोत्साहन गर्नुपर्ने हुन्छ ।
वि.सं.२०७७ साउन ८ बिहीवार २०:५२ मा प्रकाशित
