काठमाडौं । गोरखामा कोरोनाको जोखिम उच्च भएपछि भदौ १ गतेदेखि ७ गतेसम्म लकडाउन गरिने भएको छ ।
जिल्ला प्रशासन कार्यालय गोरखाको कार्यालयमा आज बसेको कोरोना भाइरस रोकथाम नियन्त्रण र व्यवस्थापनसम्बन्धी जिल्लास्तरीय कमाण्ड पोस्टको बैठकले अत्यावश्यक बाहेकका सबै सेवा भोलिदेखि एक हप्ताको लागि बन्द गर्ने निर्णय गरेको जिल्ला प्रशासन कार्यालयले जनाएको छ ।
लकडाउनमा सार्वजनिक निजी सवारी, बैंक तथा वित्तीय संस्था, उद्योगधन्दा, व्यापार व्यवसाय सबै बन्द हुनेछन्। त्यस्तै खाद्यान्न र अत्यवश्यक औषधि पसल भने सामाजिक दूरी कायम गरेर र स्वास्थ्य मापदण्ड पूरा गरेर खोल्न पाइने छ ।
त्यस्तै कपिलवस्तु जिल्ला प्रशासनले पनि भदौ ७ गते सम्म लकडाउन थप गर्ने भएको छ। आइतबार जिल्ला प्रशासन कार्यालय कपिलवस्तुले विज्ञप्ति जारी गर्दै लकडाउन लम्बाएको हो।
कपिलवस्तुमा राजमार्गमा जिल्ला बाहिरबाट आउने जाने र अतिआवश्यक वस्तु ढुवानी गर्ने सवारी साधन चल्न पाउने छन्। सरकारी कार्यालय, बैंक होटेल तथा रेस्टुरेन्टसमेत बन्द हुने भएको छ । खाद्यान्न र तरकारी खरिदका लागि बिहान ८ बजे देखि १० बजेको समय तोकिएको छ।
वि.सं.२०७७ साउन ३२ आइतवार १९:१९ मा प्रकाशित
