काठमाडौं । यसपाली दशैंमा नयाँ नोट साटन नेपाल राष्ट्र बैंकमा लाइन बस्न नपर्ने भएको छ ।
आफ्नो खाता भएको जुनसुकै बैंकबाट नयाँ नोट साट्न पाइने छ । कोरोना भाइरस प्रकोपलाई मध्यनजर गर्दै यस्तो व्यवस्था गर्न लागिएको राष्ट्र बैंकका प्रवक्ता गुणाकर भट्टले जानकारी दिए ।
प्रवक्ता भट्टका अनुसार नयाँ नोट केन्द्रीय बैंकले बैंक तथा वित्तीय संस्थालाई उपलब्ध गराउनेछ । सर्वसाधारणले आफ्नो खाता रहेको बैंक तथा वित्तीय संस्थामार्फत नयाँ नोट लिन सक्नेछन् ।
यसअघिका दशैंमा केन्द्रीय बैंकले निश्चित शाखाहरु तोकेर नयाँ नोट वितरण गर्दै आएको थियो भने नयाँ नोट लिन उक्त शाखाहरुमा सर्वसाधारणको भीड लाग्ने गरेको थियो ।
कोरोना माहामारीका कारण लाइन लगाउन सम्भव नभएपछि केन्द्रीय बैंकले आफ्नो खाता रहेको बैंकको शाखाबाट नै सर्वसाधारणलाई नयाँ नोट उपलब्ध गराउन लागेको हो ।
वि.सं.२०७७ असोज २० मंगलवार १९:३१ मा प्रकाशित
