काठमाडौं । नेपाल राष्ट्र बैंकका अनुसार ६ महिनाको अवधिमा विप्रेषण आप्रवाह ११.१ प्रतिशतले वृद्धि भई ४ खर्ब ९५ अर्ब ३१ करोड रुपैयाँ पुगेको छ ।
अघिल्लो वर्षको सोही अवधिमा विप्रेषण आप्रवाह ०.६ प्रतिशतले बढेको थियो । अमेरिकी डलरमा विप्रेषण आप्रवाह ६.७ प्रतिशतले वृद्धि भई ४ अर्ब १९ करोड पुगेको छ । अघिल्लो वर्ष यस्तो आप्रवाह ०.९ प्रतिशतले बढेको थियो ।
समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या ७७.६ प्रतिशतले घटेको छ ।
अघिल्लो वर्षको सोही अवधिमा यस्तो संख्या १७.७ प्रतिशतले बढेको थियो । वैदेशिक रोजगारीका लागि पुनः श्रम स्वीकृति लिने नेपालीको संख्या यो अवधिमा ६८.९ प्रतिशतले घटेको छ । अघिल्लो वर्षको सोही अवधिमा यस्तो संख्या ०.५ प्रतिशतले बढेको थियो । चालु आवको ६ महिनाको अवधिमा खुद ट्रान्सफर ८.९ प्रतिशतले वृद्धि भई ५ खर्ब ४९ अर्ब ५१ करोड रुपैयाँ पुगेको छ । अघिल्लो वर्षको सोही अवधिमा यस्तो ट्रान्सफर ०.४ प्रतिशतले घटेको थियो ।
चालु आवको ६ महिनामा विप्रेषण ४ खर्ब ९५ अर्ब ३१ करोड पुग्नुको मुख्य कारण डुन्डीको कारोबार भएको जानकारहरुको भनाइ छ ।
कोरोना भाइरसको कारण अहिले नेपालमा हुने आयातमा ४.८ प्रतिशतले घटेको छ । त्यसको प्रत्यक्ष असर विप्रेषणमा परेको छ ।
कोरोनाको महामारी सुरु भएपछि आयात प्राय ठप्प छ । जसका कारण हुन्डीको कारोबार पनि बन्द भएको छ । कोरोना नभएको समयमा नेपालीले हुन्डी मार्फत पैसा पठाउने गरेका कारा रेमिट्यान्समा कमी देखिने गरेको थियो । अहिले आयात कम भएपनि हुन्डीको कारोबार गर्नेले पनि पैसा लिन नमानेको जानकारहरुको भनाइ छ ।
वि.सं.२०७७ माघ २६ सोमवार १७:०९ मा प्रकाशित
