काठमाडौं । मोबाइल किनबेच गर्ने स्थल तथा मोबाइल हबको रुपमा परिचित ताम्राकार कम्प्लेक्स यतिबेला कर छलिगरेका मोबाइलको गैर कानूनी किनबेच गर्ने थलोका रुपमा परिणत भएको छ । कर छलि गरेर ल्याएका ५० लाख रुपैयाँ मूल्य बराबरको १७७ थान मोबाइल प्रहरीले नियन्त्रणमा लिएको छ, यसलाई एउटा प्रमाणको रुपमा लिन सकिन्छ ।
प्रहरीले काठमाडौं महानगरपालिका–२२ न्युरोडस्थित ताम्राकार कम्प्लेक्स तथा सोही ठाउँ पाकोस्थित मोबाइल पसलहरुबाट विभिन्न कम्पनीका १७७ थान राजस्व नतिरेको र बिल नभएको मोबाइलसहित ७ जनालाई पक्राउ गरेको छ । पक्राउ पर्नेमा ३ जना मोबाइल पसलका सञ्चालक रहेका छन भने ४ जना विभिन्न पसलमा म्यानेजरको रुपमा काम गर्ने कर्मचारी भएको महानगरीय प्रहरी वृत्तका डिएसपी दिल बहादुर मल्लले बताउनु भयो ।
उहाँका अनुसार ७ जनाबाट आईफोन लगायत विभिन्न कम्पनीका स्मार्ट फोनसहित बिल नभएको, राजस्व छलीका मोबाइलहरु नियन्त्रणमा लिइएको छ । उहाँका अनुसार कर छलिगरेर ल्याएका मोबाइल बिक्री गरिरहेको भन्ने विशेष सूचनाको आधारमा महानगरीय प्रहरी वृत्त जनसेवाले उनीहरुलाई पक्राउ गरेको हो । प्रहरीले तलासी गर्दा उक्त मोबाइलहरु फेलापारी पक्राउ गरेको छ । उक्त मोबाइल राजस्व अनुसन्धान विभागमा पठाउने तयारी भइरहेको बताउनु भयो ।
वि.सं.२०७७ फागुन १० सोमवार १२:४१ मा प्रकाशित