काठमाडौं । राजस्व अनुसन्धान विभागले नक्कली मूल्य अभिवृद्धि कर (भ्याट) बील प्रयोग गरी राजस्व छली गर्ने दुई वटा फर्म विरुद्ध मुद्धा दायर गरेको छ ।
विभागले न्यु राहुल मोवाइल सेन्टर र ब्याहुत ट्रेडर्सलाई ३० करोड २८ लाख २ हजार ५७३ रुपैयाँ विगो असुल गरी मुद्धा दायर गरेको हो ।
विभागले नक्कली मूल्य अभिवृद्धि कर प्रयोग गरी राजस्व छली गर्ने मकवानपुर जिल्ला, हेटौडा उपमहानगरपालिका वडा नं.५ बस्ने न्यु राहुल मोवाईल सेन्टर हेटौडाका प्रोप्राईटर काजल केशरी समेतबाट १२ करोड ३५ लाख २५ हजार २२ रुपैयाँ विगो असुल गरी जरिवाना र कैद मागदावी लिई चैत २६ गते उच्च अदालत पाटनको हेटौडा इजलासमा मुद्दा दर्ता गरेको छ ।
न्यु राहुल मोवाईल सेन्टर हेटौडाका प्रोप्राईटर काजल केशरी र चितरंजन प्रसादले मालबस्तु गैर विजक (लुज विल) मार्फत हाईटेक ईन्टरनेशनल प्रा.लि सँग खरिद गरी उक्त मालवस्तु खरिदको विवरण लुकाई छिपाई बिक्री गर्दा समेत विजक जारी नगरी र गैर विजक (लुज विल) जारी गरी कानुन विपरित छुट्टै खाता तयार गरी कारोवारलाई नदेखाई मूल्य अभिवृद्धि कर र आयकर समेतको राजस्व चुहावटको कसूर गरेको देखिएको छ ।
यस्तै नक्कली मुल्य अभिवउद्धि कर प्रयोग गरी राजस्व छली गर्ने विरगंज महानगरपालिका–१२ रानिघाटका ब्याहुत ट्रेडर्स विरगंजका प्रोप्राइटर अनिल कुमार कलवारबाट १७ करोड ९२ लाख ७७ हजार ५५१ रुपैयाँ विगो असुल गरी जरिवाना र कैद मागदावी लिई चैत २५ गते उच्च अदालत जनकपुर, अस्थायी इजलास विरगंजमा मुद्दा दर्ता गरिएको छ ।
ब्याहुत ट्रेडर्स विरगंजका प्रोप्राईटर अनिल कुमार कलवारले मालबस्तु गैर विजक (लुज विल) मार्फत हाईटेक ईन्टरनेशनल प्रा.लि.सँग खरीद गरी उक्त मालवस्तु खरिदको विवरण लुकाई छिपाई बिक्री गर्दा समेत विजक जारी नगरेको देखिएको छ ।
कानुन विपरित छुट्टै खाता तयार गरी कारोवारलाई नदेखाई गर्नुपर्ने भन्दा घटी कारोवार गरेको भन्ने गलत र झुठ्ठा विवरण पेश गरी मू.अ.करमा दर्ता समेत नगरी मूल्य अभिवृद्धि कर र आयकर समेतको राजस्व चुहावटको कसूर गरेको देखिएको छ ।
वि.सं.२०७८ वैशाख २ बिहीवार १८:३८ मा प्रकाशित
