काठमाडौं । चालु आर्थिक वर्षको पछिल्लो १० महिनामा नेपालबाट २० करोड बढीको चाँदीका गहना निर्यात भएको छ । भन्सार विभागले सार्वजनिक गरेको बैशाख मसान्तसम्मको तथ्याङ्कले यस्तो देखाएको हो ।
१० महिनाका अवधिमा ६४६ केजीभन्दा बढी गहना निर्यात भएको तथ्याङ्कमा उल्लेख छ । उक्त अवधिमा नेपालबाट २० करोड १८ लाख २५ हजार रुपैयाँ बराबरको चाँदीका गहना निर्यात भएको विभागले जनाएको छ ।
अहिले नेपालबाट विश्वका विभिन्न १५ देशहरुमा चाँदीका गहना निर्यात हुने गरेको विभागको तथ्याङकमा उल्लेख छ । तथ्याङ्क अनुसार अमेरिका, अष्ट्रेलिया, जापान, बेल्जियम, क्यानडा, फ्रान्स, जर्मनी, हङकङ, नेदरल्याण्ड पोर्चुगल, सिंगापुर, स्वीटजरल्याण्ड, ताइवान लगायतका देशहरुमा निर्यात हुने गरेको छ ।
विभागका अनुसार पछिल्लो समयमा नेपालीहरुको बसोबास बढी भएका मुलुकहरुमा गहना निर्यात हुने गरेको छ । विशेषगरि ति देहरुमा नेपाली मौलिक गर-गहनाको निर्यात भएको हो ।
बैशाख मसान्तसम्म सबैभन्दा बढी अमेरिकामा निर्यात भएको छ । उक्त देशमा १३ करोड ८९ लाख २८ हजार रुपैयाँ बराबरको ४७३ केजी भन्दा बढी चाँदीका गहना पुगेको हो ।
अमेरिकापछि जापान बढी माग हुने गरेको छ । जापान बैशाख मसान्तसम्म १ करोड ४३ लाख ३४ हजार रुपैयाँ बराबरको ३१ केजी चाँदीका गहना निर्यात भएको विभागले जनाएको छ ।
चालु आवको पछिल्लो १० महिनामा ५६ केजीभन्दा बढी चाँदीका गहना अष्टे«लिया निर्यात भएको छ । वैशाख मसान्तसम्म उक्त देशमा १ करोड ३४ लाख ५२ हजार, ताइवानमा १३ लाख ४५ हजार, क्यानडामा १२ लाख ६५ हजार रुपैयाँ बराबरको गहना निर्यात भएको विभागले जनाएको छ ।
त्यस्तै फ्रान्समा ८१ लाख ७७ हजार रुपैयाँ बराबरको, नेदरल्याण्डमा ७७ लाख ९४ हजार, जर्मनीमा ५७ लाख ८७ हजार, स्टीटजरल्याण्डमा ५० लाख ३७ हजार, बेलायतमा २३ लाख ४ हजार, रशियन फ्रिडेशनमा २३ लाख १ हजार रुपैयाँ बराबरको गहना निर्यात भएको छ ।
त्यसैगरि, पोर्चुगलमा ४ लाख ८५ हजार, बेल्जियममा २ लाख ७० हजार, इटलीमा १ लाख २९ हजार, हङकङमा १ लाख १७ हजार र सिंगापुरमा १ लाख रुपैयाँ बराबरका चाँदीका गहना निर्यात भएको विभागले जनाएको छ ।
वि.सं.२०७८ जेठ १४ शुक्रवार १३:१२ मा प्रकाशित
