काठमाडौं । नेपाल धितोपत्र बोर्डले राफसाफ कोष सञ्चालनमा ल्याउन नेपाल स्टक एक्सचेन्ज (नेप्से)लाई निर्देशन दिएको छ ।
नेप्सेले व्यवस्था गर्ने राफसाफ कोषमा धितोपत्र बजार, धितोपत्रको राफसाफ सेवा प्रदान गर्ने संस्था र समान रुपमा सम्पूर्ण राफसाफ सदस्यहरुको योगदान हुने गरी आर्थिक वर्ष २०७७-०७८ भित्र ५० करोड, आर्थिक वर्ष २०७८-०७९ भित्र थप ३० करोड र आव २०७९-८० भित्र थप २० करोड गरी कोषको आकार १ अर्ब रुपैयाँ बनाउने जारी विज्ञप्तिमा उल्लेख छ ।
नेप्से, राफसाफ गर्ने संस्था र ब्रोकरको तर्फबाट रकम जम्मा गर्नुपर्नेछ । राफसाफ कोषमा धितोपत्र बजारले समग्रमा कोषको ५० प्रतिशत रकम, राफसाफ सेवा प्रदान गर्ने संस्थाले समग्रमा कोषको ३० प्रतिशत र राफसाफ सदस्य (धितोपत्र दलालले) २० प्रतिशत योगदान गर्नुपर्ने छ ।
कोषमा हालसम्म नगण्य रकम मात्र जम्मा भएको छ । जसका कारण सेयर लगानीकर्ताले सेयर बिक्रीबापतको रकम भुक्तानी हुन सकेको छैन ।
नेप्सेलाई दिएको निर्देशन राफसाफ कोषको व्यवस्थापन सम्बन्धमा अन्तर्राष्ट्रिय प्रचलन अनुरुप हुनेगरी धितोपत्र बजारले कोषको संचालन समितिको रुपमा र राफसाफ सेवा प्रदान गर्ने संस्थाले कोष व्यवस्थापकको रुपमा काम गर्नुपर्ने छ ।
धितोपत्रको दोस्रो बजार दैनिक बढ्दै गएको र धितोपत्र कारोबारलाई समयमा नै राफसाफ गराई बजारलाई व्यवस्थित र अनुशासित राख्न विद्यमान राफसाफ कोषलाई कार्यान्वयन योग्य बनाउन आवश्यक रहेको बोर्डको बनाइ छ ।
वि.सं.२०७८ जेठ २० बिहीवार १९:३५ मा प्रकाशित
