काठमाडौ । काठमाडौं महानगरपालिले प्रत्येक वडामा कम्तिमा एक नमुना उपभोक्ता सहकारी संस्था स्थापना गर्ने संस्था मार्फत् बजार सञ्चालन गर्ने भएको छ । महानगरले आगामी आवको नीति तथा कार्यक्रम सार्वजनिक गर्दै यस्तो नीतिले लिने बताएको छ ।
महानगरका अनुसार उपभोक्ताको गुणस्तरीय तरकारी तथा खाद्यवस्तुको उपभोग गर्ने हक सुनिश्चित गर्न यस्तो नीति लिन लागेको हो । यस्तै तरकारी खरिद बिक्रीमा एकै स्थानमा हुने भिडभाडलाई कम गर्न सडक डिभिजन कार्यालय र महानगरीय ट्राफिक प्रहरी महाशाखासँग समन्वय गरी महानगरपालिका क्षेत्रभित्रका उपयुक्त स्थानहरूमा निश्चित समयको लागि तरकारी बजार सञ्चालन गर्न प्रोत्साहन गरिने भएको छ ।
महानगरवासीलाई सर्वसुलभ ढङ्गबाट तरकारी तथा फलफुलको आपुर्ति गर्ने व्यवस्था मिलाउनका लागि जग्गा एकीकरण आयोजना क्षेत्रभित्र शीत भण्डारसहितको आधुनिक तरकारी बजारको स्थापना गरिने नीति महानगरको रहेको छ ।
यस्तै खाद्यपदार्थको गुणस्तर कायम गर्न, तरकारी तथा फलफुल बजारलाई व्यवस्थित गर्न र समग्र आपूर्ति व्यवस्थालाई सुनिश्चित गर्न स्थानीय बजार व्यवस्थापन सम्बन्धी मापदण्ड पनि निर्माण गरिने भएको छ भने स्थानीय समुदायलाई करेसाबारी तथा कौसीखेती गर्न प्रोत्साहन गर्ने नीति रहेको छ ।
वि.सं.२०७८ असार ३ बिहीवार १६:३३ मा प्रकाशित