काठमाडौं । साताको अन्तिम कारोबार दिन बिहीबार पनि सेयर बजारमा गिरावट आउने क्रम रोकिएको छैन ।
यो दिन पनि बजारमा दोहोरो अंकको गिरावट आएको छ । बजारमा दोहोरो अंकको गिरावट आउनुका साथै कारोबार रकम पनि निकै घटेको छ । बजारमा घटबढ हुने सामान्य प्रकृया भएपनि कारोबार रकममा धेरै कमी आउँदा लगानीकर्ता त्रसित बन्न थालेका छन् ।
यो दिन बजार मापन गर्ने सूचक १६.९६ अंकले घटेर २८४३ बिन्दुमा रोकिएको छ । २१९ कम्पनीको १ करोड ३२ लाख १० हजार ३६९ कित्ता सेयर ७ अर्ब ३ करोड ३६ लाख ३ हजार ७३९ रुपैयाँको किनबेच भएको छ ।
कारोबारमा होटल तथा टुरिजम ४१.६९ र जलविद्युत समूहको उपसूचक ५५.७६ अंकले सुधार आउँदा अन्य समूहको उपसूचमा गिरावट देखिएको छ ।
कारोबारमा नेपाल पुनर्बीमा कम्पनीको ३७ करोड ८३ लाख ९५ हजार २१७ रुपैयाँको सेयर किनबेच भएको छ । दोस्रो र तेस्रो स्थानमा नेपाल इन्स्योरेन्स र अप्पर तामाकोही हाईड्रोपावर रहेको छ ।
वि.सं.२०७८ असार १० बिहीवार १५:११ मा प्रकाशित