काठमाडौं । सार्वजनिक खरिद अनुगमनको कार्यालयले विभिन्न १५ निर्माण व्यवसायी र आपूर्तिकर्ताहरुलाई २ वर्षसम्मको लागि कालोसूचीमा राखेको छ ।
प्रधानमन्त्री तथा मन्त्रिपरिषद् कार्यालय मातहतको सार्वजनिक खरिद अनुमगन कार्यालयका अनुसार ४ वटा कम्पनीलाई २ वर्ष र बाँकी कम्पनीलाई १ वर्षको लागि कालो सूचिमा राखेको छ । सार्वजनिक खरिद अनुगमनको कार्यालयले कालो सूचीमा राखेको अवधिभर कुनै खरिद कारबाहीमा भाग नलिन आग्रह गरेको छ ।
कार्यालयले कालो सूचीमा राख्न आग्रह गर्ने निकाय र निर्माण व्यवसायी तथा आपूर्तिकर्ताहरुको नाम र कालो सूचीमा राखेको अवधि सार्वजनिक गरेको हो ।
कार्यालयका अनुसार सोनिका अग्रवालको पूजा ट्रेडिङ एन्ड अर्ड सप्लायर्स, निकेश अधिकारीको शैलुङ इन्टरप्राइजेज, विभत्सु थापाको डिएमएस बुट इन्डिस्ट्रिज र भरतराज ढकालको मुक्तिनाथ कृषि कम्पनीलाई २ वर्षका लागि कालो सूचीमा राखिको सूचनामा उल्लेख छ ।
यस्तै खगेन्द्र निरोलको फ्रेन्ड्स अर्विट कन्स्ट्रक्सन सर्भिसेज, शान्ता थापाको हिमालय कन्स्ट्रक्सन, हिरामणि पौडेलको सन्देश सौगात ट्रेड सप्लायर्स, पूर्ण बहादुर बस्नेतको चुन चुन फार्मेसी, लक्ष्मीकला महतको गुरा निर्माण सेवालाई एक वर्षको लागि कालो सूचीमा राखेको छ ।
यस्तै बीएन महतोको कमला पोलिथिन एण्ड प्लास्टिक इन्ड्रस्टिज, अशोक गोयलको अम्बा स्टोर, मनोज शाही ठकुरीको निजर स्टिल फर्निचर उद्योग, हेमन्तबहादुर खड्काको न्यू सिद्ध देउराली ट्रेडर्स, पासाङ लामाको सोयाङ निर्माण सेवा र भलबहादुर राईको एसपी निर्माण सेवालाई १ वर्षका लागि कालो सूचीमा राखेको कार्यालयले जनाएको छ ।
असार २१ गतेको निर्णय अनुसार सार्वजनिक खरिद ऐन, २०६३ को दफा ६३ को उपदफा (१) बमोजिम १५ वटा निर्माण व्यवसायी-आपुर्तिकर्ताहरुलाई कालोसूचीमा राखिएको छ ।
वि.सं.२०७८ असार २२ मंगलवार १३:२० मा प्रकाशित
