काठमाडौैं । अन्य कम्पनीले चौथो त्रैमासको वित्तीय अवस्था सार्वजनिक गर्ने बेल नेपाल पुनर्बीमा कम्पनीले गत आर्थिक वर्षको तेस्रो त्रैमासको वित्तीय अवस्था सार्वजनिक गरेको छ ।
कम्पनीले यो अवधिमा ९२ करोड ५७ लाख रुपैयाँ नाफा आर्जन गरेको छ । जसमा निर्जीवन बिमा व्यवसायतर्फ ८२ करोड ४७ लाख र जीवन बिमातर्फ १० करोड १० लाख रुपैयाँ खुद नाफा आर्जन गरेको वित्तीय अवस्थामा उल्लेख छ ।
कम्पनीले गत आवको सोही अवधिमा ९१ करोड ६१ लाख रुपैयाँ मात्रै नाफा कमाएको थियो । जसमा निर्जीवनतर्फ ८२ करोड ५० लाख र जीवन बिमातर्फ ९ करोड १० लाख रुपैयाँ खुद नाफा कमाएको थियो । यो अवधिमा कम्पनीको नाफा १.५ प्रतिशतले बढेको छ ।
चालु आवको तेस्रो त्रैमासको विवरण हेर्दा निर्जीवन बिमातर्फ नाफा घटेको छ भने जीवन बिमा तर्फको नाफा बढेको छ ।
यो अवधिमा निर्जीवन व्यवसायबाट ५ अर्ब २२ करोड रुपैयाँ र जीवन व्यवसायबाट ६९ करोड ९५ लाख रुपैयाँ खुद बिमा शुल्क आर्जन गरेको छ । १० अर्ब रुपैयाँ चुक्ता पुँजी रहेको कम्पनीको निर्जीवन तर्फको जगेडा कोषमा २ अर्ब ७३ करोड र जीवन बिमातर्फ ६३ करोड ७५ लाख रुपैयाँ रहेको छ भने बीमा कोषमा २ अर्ब ३ करोड ५३ लाख रुपैयाँ रहेको छ । प्रतिसेयर आम्दानी १२ रुपैयाँ ३४ पैसा रहेको कम्पनीको प्रतिसेयर नेटवर्थ १५४ रुपैयाँ ५ पैसा रहेको छ ।
वि.सं.२०७८ साउन १ शुक्रवार १२:३१ मा प्रकाशित
