काठमाडौं । राष्ट्रिय योजना आयोगमा नवनियुक्त उपाध्यक्ष डा. विश्व नाथ पौडेलले मुलुकको आर्थिक विकास र रोजगारीको अवसर सृजना गर्नमा सुनचाँदी क्षेत्रको योगदान महत्वपूर्ण हुने बताउनुभएको छ ।
यो क्षेत्रवाट बर्षेनी अर्बौँ राजस्व प्राप्त हुने मात्र नभई लाखौको संख्यामा रोजगारीको अवसर समेत सृजना हुने भएकोले मुलुकको आर्थिक विकास र परिवर्तनमा यो क्षेत्रमा भूमिका महत्वपूर्ण रहेको उहाँले बताउनुभएको हो ।
नेपाल सनचाँदी ब्यवसायी महासंघको प्रतिनिधिमण्डलसँग भएको भेटका क्रममा उपाध्यक्ष पौडेलले सुनचाँदी क्षेत्रको विकास र विस्तारका लागि राज्यले आवश्यक पहल गर्ने बताउनुभयो ।
सुनचाँदी क्षेत्रका एजेण्डाहरुलाई राष्ट्रिय नीतिमा समावेसगरी त्यसलाई ब्यवहारमा कार्यान्वयनमा ल्याउन सके यो क्षेत्रवाट अरुबढी लाभ लिन सकिने उहाँको भनाई छ ।
मौलिक गरगहनाको संरक्षण र प्रवर्द्धन, खानी उत्खनन्, निर्यात प्रवर्द्धन जस्ता बिषयलाई आयोगले महत्वका साथ हेर्ने प्रतिवद्धता पनि व्यक्त गर्नुभयो ।
सोही अवसरमा महासंघका अध्यक्ष माणिक रत्न शाक्यले सुनचाँदी व्यवसाय सञ्चालनका क्रममा व्यवसायीले भोग्नु परेका समस्याहरुको बारेमा जानकारी गराउनुभएको थियो ।
उहाँले यो ब्यवसायको विकास र विस्तारका लागि राज्यले अवलम्वन गर्नुपर्ने नीतिका बारेमा प्रकाश पार्नुभएको थियो । बजारमा पर्याप्त मात्रामा कच्चा पदार्थको समेत आपूर्ति हुन नसक्दा यसवाट ब्यवसाय सञ्चालनमा समस्या सृजना भएको उहाँको भनाई छ ।
वि.सं.२०७८ साउन १९ मंगलवार १३:४८ मा प्रकाशित
