काठमाण्डौं । ग्रीन डेभलपमेण्ट बैंकले आइतबारदेखि निष्काशन गरेको साधारण सेयरमा २ दिनमा झण्डै ३० गुणा बढीको आवेदन परेको छ । ४ करोड ५० लाख रुपैंयाको सेयर निष्काशन भएकोमा दोस्रो दिनसम्ममा १ अर्ब २८ करोड रुपैंयाको आवेदन परेको हो ।
बैंकको सेयर निष्काशन तथा बिक्रि प्रबन्धक एनआइबिएल क्यापिटल मार्केटका अनुसार सोमबार बेलुकासम्ममा साधारण सेयरका लागि ३० गुणा बढीको आवेदन परेको छ । बागलुङमा मुख्य कार्यालय रहेको ग्रीन डेभलपमेण्ट बैंकले १० करोड रुपैंया चुक्ता पूँजी पुर्याउन ४ लाख ५० हजार कित्ता साधारण शेयर निष्काशन गरेको हो ।
इक्रा नेपालले ग्रीन डेभलपमेण्ट बैंकको साधारण सेयरलाई रेटिंग ४ दिएको छ । यसले बैंकको वित्तीय अवस्था कमजोर रहेको जनाउँछ । बैंकको वित्तीय अवस्था त्यति सन्तोषजनक नभएको र सर्वसाधारणमा बिक्रीमा ल्याइएको सेयर संख्या कम भएकाले लगानीकर्ताले धेरै रकम फसाउनु फाइदाजनक देखिदैन । निष्काशन गरेको सेयर संख्या कम हुनुका साथै आवेदक धेरै हुने भएकाले सेयर बाँडफाँडमा गोलाप्रथा हुने पक्का छ ।
२५ जेठ २०७३, ११.००
वि.सं.२०७३ जेठ २५ मंगलवार ११:४६ मा प्रकाशित
