काठमाण्डौं । नेपाल बंगलादेश बैंकले ८० प्रतिशत हकप्रद सेयर जारी गर्ने निर्णय गरेको छ । बैंकको शुक्रबार बसेको संचालक समिति बैठकले हाल कायम १० कित्ता सेयर बराबर नयाँ ८ कित्ताका दरले हकप्रद सेयर जारी गरी पूँजी बढाउने निर्णय गरेको हो ।
राष्ट् बैंकको निर्देशन अनुसार आठ अर्ब पूँजी पूर्याउन कुनै ठोस कदम नचालेको बंगलादेश बैंकले हकप्रद सेयर निष्काशन गर्ने चर्चाले पछिल्ला दिनहरुमा शेयर मूल्य र कारोबार बढेको थियो । रिलायबल डेभलपमेन्ट बैंक, ग्लोबल आइएमई बैंक लगायतका कम्पनीहरुसँग मर्जरको पहल गरेपनि सफल हुन नसकेपछि लगानीकर्ताहरुले एनबी बैंकले ठुलो मात्रामा हकप्रद निष्काशन गर्ने अनुमान गरेका थिए ।
नेपाल बंगलादेश बैंकको हाल चुक्ता पूँजी ३ अर्ब ४ करोड रहेकोमा हकप्रद जारीपछि ५ अर्ब ४७ करोड नाघ्ने छ ।
३० जेठ २०७३, ९।००
वि.सं.२०७३ जेठ ३० आइतवार ११:३३ मा प्रकाशित
