काठमाडौ । सेयर बजारमा शुक्रबार देखी दुई जलविद्युत कम्पनीको २ अर्ब ५१ करोड ६० लाख रुपैया बराबरको आइपिओमा लगानी खुल्ला भएको छ । रसुवागढी जलविद्युत र साञ्जेनको गरि एकै पटक उक्त परिमाणमा आइपिओ बजारमा आएको हो ।
उक्त आइपिओमा सञ्चयकोषका ६ लाख बढी सञ्चयकर्ता, कोषका कर्मचारी, रसुवाका साविक गाविसका कर्मचारी र रसुवा विल्ला समन्वय समितिमा कार्यरत कर्मचारीहरुले आवेदन गर्न पाउने आयोजनाले जनाएको छ । आइपिओ बिक्रिका लागि सम्पुर्ण प्रक्रिया सकिएको पनि आयोजनाले जनाएको छ ।
एउटै समयमा सेयर बिक्री गर्न लागेका रसुवागढी र साञ्जेन दुवै चिलिमे जलविद्युत कम्पनीका सहायक कम्पनीहरु हुन् । दुवै आयोजनाको सेयर एकैपटक निष्काशन भएकाले लगानीकर्तालाई सहज हुने र दुवै आयोजनामा कर्मचारी सञ्चयकोषको लगानी भएकाले कोषमा कार्यरत कर्मचारी तथा सञ्चयकर्ताहरुले बढी सेयर पाउनेछन् ।
सिद्धार्थ क्यापिटल र ग्लोबल आइएमई क्यापिटल मार्फत बिक्री हुने रसुवागढीको एक अर्ब ६४ करोड रुपैया बराबरको आइपिओमा सञ्चयकोषका सञ्चयकर्ता, कर्मचारी र ऋण लागानी गर्ने संस्थाका कर्मचारीले आवेदन दिन पाउनेछन् । उक्त आइपिओमा कोषका कर्मचारीले २ हजार ५ सय कित्ता र अन्यले ५ सय कित्ता बराबर आवेदन दिन पाउने बिक्री प्रबन्धकले जनाएका छन् ।
लगानी संरचना संस्थापक ५१ र सर्वसाधारण ४९ प्रतिशत भएको रसुवागढीले दोस्रो चरणमा रसुवावासीलाई १० प्रतिशत र सर्वसाधारणलाई १५ प्रतिशत गरि १ अर्ब ७५ करोड रुपैया बराबरको आइपिओ जारी गर्नेछ ।
त्यस्तै साञ्जेन जलविद्युत कम्पनीले पनी शुक्रबार अर्थात आजैबाट ८७ करोड ६० लाख रुपैया बराबरको आइपिओको बिक्री सुरुवात गरेको छ । नागरिक लगानी कोषलाई बिक्री प्रबन्धक तोकेको आयोजनाले सञ्चयकर्तालाई बढीमा ३ सय कित्तामा आवेदन दिनसक्ने बताएको छ । आजबाट बजारमा आएका दुवै कम्पनीका सेयर सिआस्वा मार्फत कारोबार गर्न सकिने व्यावस्था मिलाइएको छ ।
२०७४ फागुन ११ गते प्रकाशित
वि.सं.२०७४ फागुन ११ शुक्रवार ०८:३३ मा प्रकाशित
