पोखरा । छ महिना पुरा गरेको प्रधानमन्त्री केपी शर्मा ओलीको सरकार पुर्ण सफल देखिएको प्रधानमन्त्रीका स्वकिय सचिव रमेश आचार्यले दाबी गरेका छन् । असहज परिस्थितिमा गठन भएको सरकारले मधेश आन्दोलन र नाकाबन्दीबाट मुलुकलाई पार लगाउँदै छिमेकीसँगको सम्बन्ध सुमधुर बनाउन सक्नु नै सरकारको सफलता भएको उनको जिकिर छ ।
नेकपा एमाले धादिङ पोखरा सम्पर्क मञ्चले पोखरामा हिजो शनिबार आयोजना गरेको नयाँ वर्ष २०७३ को शुभकामना आदानप्रदान तथा क्यालेण्डर विमोचन कार्यक्रममा आचार्यले अब भुकम्पबाट प्रभावितका लागि काम गर्ने र यसपछि कसैले पनि सरकार असफल भयो भन्नै नसक्ने ठोकुवा गरे । ‘नाकाबन्दीले मुलुक आक्रान्त भएको बेला सरकार गठन भयो । ठुलो दलले सहमति तोडेका बेला राष्ट्रियताको जगमा बनेको सरकार हो ।’ युवा संघ नेपालका केन्द्रिय सचिवालय सदस्य समेत रहेका उनले भने– ‘मधेश आन्दोलन यहाँसम्म आएको छ । छिमेकी मुलुकसँग पारवहन लगायत महत्वपूर्ण सम्झौता भएको छ ।’
धादिङ पोखरा सम्पर्क समितिका अध्यक्ष झम्क सारु मगरले पोखरामा रहेका सबै धादिङबासीहरु एकजुट भएर अघि बढ्नुपर्ने बताए । सो अवसरमा प्रमुख अतिथि आचार्य, विशेष अतिथि सारु, सल्लाहकार संयोजक एवं एमाले कास्की क्षेत्र नं. २ विशेष नगर ईलाका कमिटि अध्यक्ष वीरबहादुर थापा, पोखरा वडा नं. ९ अध्यक्ष प्रकाश शर्मा लगायतले संयुक्त रुपमा क्यालेण्डर विमोचन गरेका थिए ।
मञ्चका अध्यक्ष बेनि पाठकको अध्यक्षतामा भएको कार्यक्रममा निवर्तमान अध्यक्ष कृष्णबहादुर लम्सालले स्वागत तथा सचिव गोकर्ण अधिकारीले सञ्चालन गरेका थिए । क्यालेण्डर प्रकाशन उपसमिति संयोजक योगप्रसाद सापकोटा (नवराज) ले क्यालेण्डर छपाईका लागि संकलित रकमबारे जानकारी गराएका थिए ।
२८ चैत २०७२, १०.००
वि.सं.२०७२ चैत २८ आइतवार १३:३१ मा प्रकाशित
