काठमाडौ। पछिल्लो समय पदयात्री सूचना व्यवस्थापन प्रणाली (टिम्स) को विषयमा निकै ठूलो विवाद हुँदै आएको छ । उक्त रकम दिने र पाउने पक्षबीच पटक पटककको वार्ता र एक छुट्टै समिति गठन गरिएपनि टिम्सबापतको रकमको अझै टुंगो लाग्न सकेको छैन । टिम्सको रकमबारे आपसी निर्णय लिन एक छुट्टै समिति बनेपनि समितिको कामप्रति व्यवसायी नै रुष्ट बनेका छन् । यस्तैमा टिम्सबापतको रकम नदिएको भन्दै ट्रेकिङ एजेन्सिज एसोसिएसन अफ नेपाल (टान)ले नेपाल पर्यटन बोर्डविरुद्ध आन्दोलनको चेतावनी दिएको छ । नेपाल पर्यटन बोर्डकै हलमा एक कार्यक्रमको आयोजना गरी टानले यस्तो चेतावनी दिएको हो ।
टिम्स रकममा अनियमितताको आरोप लागेपछि संसद्को अन्तर्राष्ट्रिय सम्बन्ध तथा श्रम समितिले महालेखा परीक्षकबाट लेखा परीक्षण नगराएको भन्दै १८ चैत २०७१ मा टिम्स कार्डबापतको रकम टानलाई उपलब्ध नगराउन निर्देशन दिएको थियो । त्यस यता बोर्डले टानलाई रकम उपलब्ध गराएको छैन ।
टानले आयोजना गरेको उक्त कार्यक्रममा पर्यटन क्षेत्रका विभिन्न संघ संस्थाका नेतृत्वकर्ता र पर्यटन क्षेत्रका बारेमा बोल्ने बक्ताहरुले टिम्ससम्बन्धि विवाद तत्काल अन्त्य गरिनुपर्नेमा जोड दिएका थिए । कार्यक्रममा टानका पदाधिकारीहरुले पूर्व कार्यसमितिले भ्रष्टाचार गरेको भनेर त्यसको सजायँ वर्तमान कार्यसमितिलाई दिन नमिल्ने भनाई राख्दै टिम्सबापत पाउनुपर्ने रकम तत्काल उपलब्ध गराउन भनेका थिए । यदि हाम्रा मागको सुनुवाई भएन भने हामी आन्दोलनमा जान बाध्य बन्नेछौं, टान पदाधिकारीहरुको चेतावनी थियो ।
टानका केहि पदाधिकारीले टिम्स कार्डको छपाईदेखि वितरणसम्ममा उल्टै बोर्डले घोटला गरेको आरोपसमेत लगाएका छन् ।
२०६६ मा भएको बोर्ड–टान बीचको पहिलो सम्झौता अनुसार टिम्स कार्ड बिक्रीबाट उठेको रकम मध्य ३० प्रतिशत बोर्ड, ३० प्रतिशत टानको भागमा पर्छ भने १० प्रतिशत मजदूर कोषमा जम्मा गर्नुपर्छ र बाँकी ३० प्रतिशत दुबै संस्थाले संयुक्त रुपमा पर्यटन विकासमा खर्च गर्न पाउँनेछन् ।
२०६६÷६७ देखि २०६८÷६९ सम्मको तीन आर्थिक वर्षमा टानले रु२ करोड ५० लाख अनियमितता गरेको ठहर गरेको छ । सो अवधिमा टिम्स कार्डबाट टानले गरेको करीब रु७ करोड १५ लाख ९६ हजार ८०५ आम्दानीमध्ये रु३ करोड २८ लाख ७८ हजार १३८ खर्च गरेको तथ्यांक छ । त्यस्तै आव २०६९÷७०, २०७०÷७१ मा टानले विना प्रमाण र तोकिएको उद्देश्य विपरीत कम्तीमा रु४ करोड खर्च गरेको आन्तरिक लेखा परीक्षण प्रतिवेदनले देखाएको छ । टानले २०७० चैतसम्म करीब रु१० करोड ११ लाख ३३ हजार ९३१ उठाएको आन्तरिक लेखा परीक्षण प्रतिवेदनमा उल्लेख छ ।
टिम्सको रकम नपाउँदा गन्तव्यको पहिचान, विकास तथा प्रवद्र्धन र टिम्स प्रशासनको पुरै काम ठप्प बनेको भन्दै टान कार्यसमितिले आक्रोश पोखेको थियो ।
प्रकाशित मितिः २०७३ बैशाख ६
वि.सं.२०७४ वैशाख ६ बुधवार ११:०२ मा प्रकाशित
