पोखरा । पोखरा उपत्यकाका नौ ताल अन्तर्राष्ट्रिय महत्वको रामसार सूचीमा सूचीकृत हुने भएका छन्।
विश्व सिमसार दिवस फेब्रुअरी २ (माघ १९) मा रामसारमा सूचीकृत भएको घोषणा गर्ने तयारी यहाँ सुरु भएको छ। रामसारमा सूचीकृत हुन सबै प्रक्रिया पूरा भइसकेको छ।
सरकारले यस वर्षको विश्व सिमसार दिवस पोखरामा एक कार्यक्रमसहित मनाउने तयारी गरेको छ। सोही समारोहमा यहाँका तालहरू रामसारमा सूचीकृत भएको प्रमाणपत्र रामसार सचिवालयका एसिया प्यासिफिक रिजन सल्लाहकार लिउ योङले जिल्ला विकास समिति कास्कीका प्रतिनिधिलाई हस्तान्तरण गर्ने कार्यक्रम रहेको राष्ट्रिय निकुञ्ज तथा बन्यजन्तु संरक्षण विभागका प्रवक्ता तथा रामसार महासन्धिका फोकल व्यक्ति डा. महेश्वर ढकालले जानकारी दिए।
सोही दिनदेखि पोखराका नौ ताल रामसारमा सूचीकृत हुने ढकालले बताए।रामसार क्षेत्रमा सूचित गर्न चार वर्षदेखि यहाँका ताल र सीम क्षेत्रको अध्ययन गरेर एक वर्षअघि वन मन्त्रालयमातहतको राष्ट्रिय निकुञ्ज तथा बन्यजन्तु संरक्षण विभागले फेवाताल, वेगनाश, रूपा, कमलपोखरी, खास्टे, गुदे, निउरेनी, दिपाङ र मैदी ताललाई रामसार सूचीमा समेट्ने प्रक्रिया अगाडि बढाएको थियो।
तालहरू रामसार सूचीमा सूचीकृत हुँदा अन्तर्राष्ट्रिय पहिचान पाउनुको साथै पर्यटकीय महत्वसमेत बढ्ने रामसार महासन्धिका फोकल व्यक्ति डा. ढकालले बताए। यसबाट संरक्षण र सदुपयोगमा स्थानीयको सहभागिता बढ्नुको साथै संरक्षणमा अन्तर्राष्ट्रिय चासोसमेत हुने जिल्ला वन कार्यालय कास्कीका प्रमुख प्रभात सापकोटाले सुनाए।
अन्नपुर्ण पोस्ट
वि.सं.२०७२ माघ ८ शुक्रवार ०९:०७ मा प्रकाशित
