काठमाडौं । उद्योगमन्त्री सोमप्रसाद पाण्डेको मंगलबारको दैनिकी सधैंको भन्दा फरक थियो । भेटघाट, बैठक र फाइल सदर गरेर दिन बितउने उनी मंगलबार भने काठमाडौंका गल्ली र कुनातिर कुदेका देखिन्थे ।
उनी त्यसै कुदेका भने थिएनन् । मन्त्री पाण्डे जमिनमुनिको ग्यास खोज्न हिँडेका थिए । पाण्डे उपत्यकाका जमिनमुनिबाट ग्यास निकाल्न काम गरिएका प्लान्टको निरीक्षणमा निस्केका हुन् । विज्ञका अनुसार काठमाडौंमा १४ ठाउँमा यस्ता प्लान्ट निर्माण सुरु गरिएको छ ।
जापान सहयोग नियोग (जाइका) को सहयोगमा निर्माण सुरु गरिएका ती प्लन्ट विभिन्न कारणले बीचैमा रोकिएका थिए । रोकिएको काम तुरुन्तै अगाडि बढाउन अघिल्लो महिना निर्देशन दिएकाले प्रगति विवरण हेर्न आफू निरीक्षणमा निस्केको मन्त्री पाण्डेले बताए । प्लन्टमा झार उम्रेको र खिया लागेको पाइएकाले तिनलाई फेरिएको थियो ।
ललितपुरको इमाडोलमा १ रोपनी क्षेत्रफलमा फैलिएको ग्यास प्लन्ट २०३८ सालदेखि निर्माण सुरु गरिए पनि हालसम्म सम्पन्न भएको छैन । अघिल्लो सातादेखि पुनः यो प्लान्टको निर्माण थालिएको खानी तथा भूगर्भ विभागका महानिर्देशक सर्भुजितप्रसाद महतोले बताए ।
उनका अनुसार यो ग्यास प्लान्टबाट कति ग्यास आउँछ भन्ने अध्ययन गर्न एक महिना समय लाग्छ । अध्ययनपछि मात्रै कति घरपरिवारलाई दिन सकिन्छ, त्यसैअनुसारको वितरणप्रणाली बनाइनुपर्नेमा जोड दिँदै उनले भने, ‘ग्यास वितरणका लागि आवश्यक पर्ने पाइप जमिनमुनि गाडेर उपभोक्ताको घरसम्म पु्याइनेछ ।
मन्त्री पाण्डेले यो प्लान्टबाट राम्ररी ग्यास निस्किए ६ महिनाभित्र उपभोक्तामा पुर्याउन सकिने जनाए । निरीक्षणका क्रममा काठमाडौंको टेकुमा भने ग्यास बुलेट नै रहेको पाइएको थियो । बुलेटको ग्यास पाइपमार्फत वितरण गरिएको थियो । यो ग्यास सेनाको ब्यारेक, टेकु अस्पताल र भेटनरी विभागमा वितरण गरिएको थियो ।
तर २०५२ सालमा जमिनमुनि राखिएको पाइपमा समस्या देखिएपछि बन्द भएको थियो । टेकुकै फोहोरमैला विभाग पछाडि रहेको प्लान्ट निर्माण स्थलमा पानी उम्लिएको थियो । खानी विभागका कर्मचारीले मिनरल वाटरको बोतल काटी आगो बालेरै देखाएका थिए ।
उद्योगमन्त्री पाण्डेले जमिनमुनिको ग्यास निकालेर र पुराना प्लान्ट मर्मत गरी उपभोक्तालाई वितरण गरिने बताए ।उनका अनुसार दैलेखमा भेटिएको ग्यास भने सिल्डिरमा भर्न मिल्ने खालको भएकाले त्यसको सम्भाव्यता अध्ययन भइरहेको छ । मन्त्री पाण्डेका अनुसार यी प्लान्टलाई पूर्ण सञ्चालनमा ल्याउँदा तीस हजार घरपरिवारलाई ५० वर्ष पुग्नेछ ।
बालकुमार नेपाल/ अन्नपुर्ण पोष्ट
प्रकाशित मिति २०७२/१०/१३
वि.सं.२०७२ माघ १३ बुधवार १८:२५ मा प्रकाशित
