काठमाडौँ । सूचना तथा सञ्चारमन्त्री शेरधन राईले नेपाल टेलिकमको मोबाइल सेवामा एक साताभित्रै सुधारको अनुभूति हुने गरी प्रविधि परिचालन गर्न टेलिकमलाई निर्देशन दिएका छन्।
नेपाल टेलिकमका प्रबन्ध निर्देशक बुद्धि आचार्यसहित उच्च अधिकारीलाई बुधबार मन्त्रालयमा उपस्थित गराएर मन्त्री राईले टेलिकमको मोबाइल सेबाप्रति जनताको गुनासो बढेकाले छिटो सेवा सुधार गर्न निर्देशन दिएका हुन्। राईले टेलिकम पदाधिकारीसँग सेवा सुधारका लागि भएका विभिन्न प्रयासका बारे जानकारी पनि लिएका थिए।
मन्त्रालयका निमित्त सचिव एकनारायण अर्यालसहितको छलफलमा राईले तत्काललाई काठमाडौं उपत्यकालाई विशेष प्राथमिकतामा राखेर एक महिनाभित्र पूर्णरुपमा गुणस्तरीय सेवा उपलब्ध गराउन निर्देशन दिँदै देशका सबै भू–भागमा थ्रीजी सेवा विस्तार गर्ने र टुजी विस्थापित गरी फोरजिमा जाने कार्यक्रमसमेत टेलिकमसँग मागेको सञ्चार मन्त्रालयका प्रेस सल्लाहकार मातृका पौडेलले जानकारी दिए।
छलफलमा टेलिकमका प्रबन्ध निर्देशक आचार्यले लोडसेडिङका कारण टेलिकमका बिटिएस टावर डाउन हुने हुँदा नेटवर्कमा समस्या आउने गरेको भन्दै पर्याप्त ब्याकअपको काम भइरहेको जानकारी दिए। रासस
१२ फागुन २०७२, १२.००
वि.सं.२०७२ फागुन १२ बुधवार १२:४० मा प्रकाशित
