नयाँ दिल्ली । २ दिन अघि दिल्लीको तिहार जेलबाट रिहा भएका जवारलाल नेहरु विश्वविद्यालयका विद्यार्थी नेता कन्हैया कुमारलाई गोली हान्नेलाई ११ लाख भारु रुपैयाँ दिने उल्लेख गरिएका पोस्टर दिल्लीका सार्वजनिक स्थानमा भेटिएका छन्।
भारतीय समाचार पत्र इन्डियन एक्सप्रेसले त्यस्ता पोस्टरहरु बस स्टप र मेट्रो रेल वे स्टेशनमा टाँसिएको जनाएको छ। पोष्टरमा कन्हैयालाई देशद्रोही उल्लेख गर्दै उनलाई गोली हान्नेलाई पूर्वाञ्चल सेनाको तर्फबाट ११ लाख रुपैयाँ दिने बताइएको छ।
पोस्टरमा पूर्वाञ्चल सेनाका तर्फबाट आदर्श शर्माको नाम र मोबाइल नम्बर उल्लेख गरिएको छ।
तिहार जेलबाट रिहा भएपछि कन्हैयाले जेएनयुमा दिएको भाषण अहिले चर्चित बनेको छ। सो भाषणमा उनले भारतको संविधानलाई आफूले सधैँ पालना गर्ने बताएका छन्।
दिल्ली प्रहरीले विश्वविद्यालय प्रशासनसँग कन्हैयाको बाहिर जाने कार्यक्रम भए पहिले नै जानकारी गराउन भनेको छ। साथै प्रहरीले पोस्टरमा नाम र नम्बर उल्लेख भएका शर्माको खोजी गरिरहेको पनि बताएको छ।
प्रकाशित : सेतोपाटी, २३ फागुन, २०७२, ११.००
वि.सं.२०७२ फागुन २३ आइतवार १२:११ मा प्रकाशित
