काठमाडाैं । नेपाली कांग्रेसको महामन्त्री पदमा शशांक कोइराला विजयी भएका छन् ।
भरखरै सकिएकाे मतगणनामा शेरबहादुर देउवा प्यानलका अर्जुन नरसिंह केसीलाई पराजित गर्दै काेइराला विजयी भएका हुन् । काेईरालाले १ हजार ४ सय १७ मत प्राप्त गरे पनि उनका प्रतिद्वन्दी शेरबहादुर देउवा प्यानलका अर्जुन नरसिंह केसीले १ हजार १७ मत ल्याए । त्यस्तै कृष्ण सिटौला प्यानलका गगन थापाले ५ सय ८४ मत ल्याए ।
मेडिकल डाक्टर समेत रहेका उनी नवलपरासी १ का सांसद हुन् । शशांक कांग्रेसका संस्थापक नेता वीपी कोइरालाका पुत्र हुन् ।
त्यस्तै कोषाध्यक्ष मा सितादेवी यादव निर्वाचित भएकी छन् । सितादेवीले चित्रलेखा यादवलार्इ ८ मतले पछि पार्दै निर्वाचित भएकी हुन् ।
सितादेवी रामचन्द्र पौडेल प्यानलबाट र चित्रलेखा शेरबहादुर देउवा प्यानलबाट चुनाव लडेका थिए । सितादेवीले १ हजार २ सय १७ र चित्रलेखाले १ हजार २ सय ९ मत पाएका छन् । त्यस्तै कृष्ण सिटौला प्यानलका उमाकान्त चौधरीले ४५७ र कृष्ण कार्कीले ६६ मत पाए ।
काे हुन् शशांक कोइराला ?
वीपी कोइरालाका तीन छोरामध्ये कान्छा हुन् शशांक कोइराला । उनको जन्म वि.स. २०१५ सालमा विराटनगरमा भएको हो । लामो समय चिकित्सा पेसमा सम्लग्न आँखा रोग विशेषज्ञ डाक्टर कोइराला ०४६ सालको जनआन्दोलनमा चिकित्सकहरुका तर्फबाट सहभागी भएका थिए । परिवारसँगै २०१७ देखि २०३६ सालसम्म निर्वासित जीवन बिताएका कोइराला ०६७ को १२ औं महाधिवेशनमा चौथो स्थानको मत ल्याएर केन्द्रीय सदस्यमा विजयी भए । उनी नवलपरासीबाट ०६४ र ७० को दुइ वटै संविधानसभा निर्वाचनमा विजयी भएका थिए ।
वि.सं.२०७२ फागुन २५ मंगलवार १८:१७ मा प्रकाशित
