विराटनगर । भन्सारका एजेन्ट आन्दोलित भएपछि विराटनगर भन्सार ठप्प भएको छ। भन्सार तिरेर ल्याएको सामान प्रहरीले पक्राउगरी आन्तरिक राजस्व कार्यालयमा बुझाएको भन्दै विराटनगर भन्सारका एजेन्ट मङ्गलबार दिउँसो देखि पेनडाउनसहित आन्दोलित भएपछि भन्सारको राजस्व असुली ठप्प भएको हो।
वैधानिक रुपमा भन्सार तिरेर ल्याएको सामान प्रहरीले पक्राउ गरी दुःख दिएको विरोधमा पेनडाउनसहित आन्दोलन थालेको विराटनगर भन्सार एजेन्ट संघका अध्यक्ष विजेन्द्र परासरले जानकारी दिए। फागुन २२ गते अवैध रुपमा भन्सार छलेर कपडा ल्याएको भन्दै को १ ख ३७७४ नम्बरको ट्रकप्रहरीले पक्राउ गरेको थियो।
सो ट्रकको सामान वैधानिक रुपमा ल्याइएको एजेन्टहरूको दाबी छ । अध्यक्ष परासरले भने, ुवैधानिक रुपमा ल्याइएको सामान पक्राउ गरेर प्रहरीले दुःख दिने नियत राखेकाले आन्दोलन थाल्नु पर्यो। उनिहरूले विना शर्त ट्रक छाड्न माग राखेका छन्। माग पूरा नभए दुई दिन आँशिक रुपमा काम ठप्प पारे पनि बिहीबारदेखि अनिश्चितकालीन पेनडाउन सुरु गर्ने चेतावनी पनि एजेन्टहरूले दिएका छन्।
यता भन्सार एजेन्टहरूको आन्दोलनका कारण विराटनगर भन्सारको राजस्व असुली प्रभावित भएको छ। विराटनगर भन्सार कार्यालयका अधिकृत राजेन्द्र ढुङ्गानाका अनुसार मङ्गलबार दिउँसो देखि एजेन्ट आन्दोलित भएकाले दैनिक ६ करोड रुपैयाँ राजस्व असुली गर्दै आएको विराटनगर भन्सारले मङ्गलबार साूढे २ करोड मात्रै संकलन गरेको छ । एजेन्टको आन्दोलनले बुधबार दिउँसो सम्मको असुली पूर्ण रुपमा ठप्प भएको छ ।
प्रकाशितः २०७२ फाल्गुन २६
वि.सं.२०७२ फागुन २६ बुधवार १७:११ मा प्रकाशित
