काठमाडौं । बैंकको लकरमा गोली फेलापरेपछि अनुसन्धानका क्रममा प्रहरी हिरासतमा रहेका एमाओवादीका सांसद एवं पूर्वमन्त्री ल्हारक्याल लामाले पोलिग्राफ टेस्ट गर्न नमानेको प्रहरीले जनाएको छ ।
स्वास्थ्यको कारण देखाउँदै लामाले पोलिग्राफ टेस्ट गर्न नमानेको महानगरीय प्रहरी परिसर टेकुले जनाएको हो ।
परिसरका प्रवक्ता एसपी प्रद्युम्न कार्कीले भने, ‘हामीलाई थप प्रमाण जुटाउनु थियो । पोलिग्राफ टेस्ट गरौं भन्दा लामाले मानेनन् । थप अनुसन्धान भइरहेको छ ।
मंगलबार अख्तियार दुरुपयोग अनुसन्धान आयोगले स्ट्यान्डर्ड चार्टर्ड बैंकको लाजिम्पाट शाखामा लामाका नाममा रहेको लकर फेलापारेपछि खोजतलास गरेको थियो । त्यहाँ अख्तियार टोलीसँग प्रहरी पनि पुगेको थियो । लकरभित्र केही फेला नपरेको जानकारी प्रहरीले दिएको छ ।
अकुत सम्पत्ति आर्जनका सिलसिलामा आयोगको छानबिनका क्रममा गत आइतबार नेपाल इन्भेस्टमेन्ट बैंक दरबारमार्गमा लामाका नाममा रहेको लकरभित्र १४ राउन्ड गोली फेलापरेको थियो । सोही घटनालाई लिएर लामा प्रहरी हिरासतमा छन् । पोलिग्राफ मेसिनले मानिसले झूटो बोलेनबोलेको विश्लेषण गर्छ ।
प्रकाशितः२०७२ चैत ३
वि.सं.२०७२ चैत ३ बुधवार १२:०२ मा प्रकाशित
