बागलुङ । ढोरपाटन शिकार आरक्षमा सुरु भएको झारल र नाउको दोस्रो यामको शिकारका लागि नेपाल वाइल्ड लाइफ सफारी, हिमालयन सफारी प्रालि, ग्लोबल सफारी प्रालि, ट्रयाक एन्ड टेल्र्स प्रालि र ओपन नेपाल वाइल्ड लाइफ सफारी मार्फत विदेशी शिकारी आएका छन् ।
अमेरिका, जर्मनी, स्पेन, दक्षिण अमेरिका र नर्वेबाट शिकारी ढोरपाटन आउने गरेको सहायक संरक्षण अधिकृत पशुपति अधिकारी बताएका छन् । उनका अनुसार आरक्षको फागुने, वार्षे, सेङ, दोगाडी, घुस्तुङ र सुनदह ब्लक गरी छ ब्लगमा दोस्रो यामका लागि सिकार अनुमति दिइएको छ।
एउटा नाउर र झारलको शिकार बापत डेढदेखि दुई लाख रुपैयाँसम्म राजस्व कायम गरिएको छ । यो रुपैयाँ गत वर्षको तुलनामा कम हो । गत वर्ष अधिकतम पाँच लाख ५५ हजार र न्यूनतम एक लाख ४६ हजार तथा झारलको अधिकतम छ लाख ४६ हजार र न्यूनतम एक लाख आठ हजार दर कायम गरिएको थियो।
ढोरपाटनमा शिकारका लागि असोजदेखि मङ्सिरसम्म पहिलो याम र फागुनदेखि वैशाखसम्म दोस्रो याम खुला हुने पनि आरक्षले जानकारी दिएको छ ।
१४ चैत, २०७२, ९.००
वि.सं.२०७२ चैत १४ आइतवार १०:३७ मा प्रकाशित
