काठमाण्डौं । गोर्खा विकास बैंकमा कार्यरत केही कर्मचारीले बैंक नाफामा जाँदासमेत आफूहरुले बोनस नपाएको भन्दै श्रम कार्यालय बागमतीमा निवेदन दर्ता गएका छन्। उनीहरुले नाफा भएको वर्षमा बोनस नपाएको भन्दै निवेदन दिएका हुन्।
उनीहरुले बैंकको वासलातको अध्ययन गरी बोनस वितरण गराइदिन माग पनि गरेका छन्। कर्मचारीहरुले श्रम कार्यालयमा बुझाएको निवेदन अनुसार बैंकले गत आर्थिक वर्षमा ४३ करोड ५२ लाख रुपैयाँ खुद नाफा गरेको थियो।
बैंकको सञ्चित कोष नोक्सानमा रहेपनि वार्षिक रुपमा नाफा गरिरहेकाले त्यही नाफाबाट बोनस पाउनु पर्ने दावी गरेका छन्। बैंकमा कार्यरत कर्मचारीहरु लालबहादुर गुरुङ, निलम राई, सगुन श्रेष्ठ, सरोजमणि अधिकारी, विश्वास खड्का, राजकुमार तामाङ, राम रावल र जीवनकाजी कार्की मिलेर श्रम कार्यालयमा उजुरी दिएका हुन्। निवेदनमा गोर्खा विकास बैंकलाई विपक्षी बनाइएको छ।
१४ चैत, २०७२, ११.३०
वि.सं.२०७२ चैत १४ आइतवार १४:५१ मा प्रकाशित
