पोखरा । यहाँका पर्यटन व्यवसायीहरुले श्रम ऐनअनुरुप पर्यटन श्रमिकहरुलाई तलब, भत्ता, लगायत अन्य सुबिधा उपलब्ध गराउने उद्घोष गरेका छन् । होटेल उडल्याण्ड पोखरामा नेपाल ट्रेड युनियन महासंघ (जिफन्ट) अन्तर्गतको पर्यटन क्षेत्र युनियन परिषद् र पोखराका पर्यटन व्यवसायी सम्मिलित संयुक्त अन्तक्र्रियामा व्यवसायीहरुले श्रमिकसंगको सहकार्यमा पर्यटनको विकासमा लाग्ने बताए ।
कार्यक्रममा नाट्टा पश्चिमाञ्चलका महासचिव सुवास भण्डारीले पर्यटन क्षेत्रमा देखा परेको समस्या समाधान गर्न पर्यटन क्षेत्रका मजदुर युनियन यूनिट्राभ, नेस्वहोमयू लगायत संघसंस्थासँग सहकार्य गरिने बताए । उनले भने, ʽश्रम ऐन अनुरुप सबै व्यवसायीले श्रमिकहरुलाई न्यूनत्तम पारिश्रमिक, सामाजिक सुरक्षा लगायतको व्यवस्था गर्नेछौं ।ʼ
टान क्षेत्रीय कमिटि पोखराका उपाध्यक्ष हरि भुजेलले ट्रे्िकङ ब्यवसायमा काम गर्ने श्रमिकको गाइड लाइसेन्स नबिकरणमा देखा परेको समस्यालाई तत्काल समाधान गर्न टानले आवश्यक कार्य गर्ने बताए ।
पर्यटन व्यवसायी गोपाल पहाडी, बासु त्रिपाठी, जीवन सापकोटा लगायतले होटल क्षेत्रका श्रमिकहरुलाई स्थाईका साथै नियुक्ति पत्र, उनीहरुको सामाजिक सुरक्षाको ग्यारेण्टी गरिने र कानुनी दायरामा रहेका ट्रेड युनियन संगठनलाई समर्थन गरिने बताए ।
संयुक्त अन्तक्रिया हुनुभन्दा अगाडि श्रमिकहरु भेला भई पर्यटन व्यवसायीहरुले आफुहरुमाथि श्रमशोषण गर्ने गरेको आरोप लगाएका थिए ।
कार्यक्रममा नेकपा एमाले कास्की जिल्ला नेता भिमसेन भुजेल, जिल्ला सचिवालय सदस्य धन बहादुर नेपाली, एमाले उधोग बिभाग सदस्य युवराज पौडेलले श्रमिकका कानुनी अधिकार पुरा गर्न व्यवसायीलाई आग्रह गर्दै श्रमिकहरुले पनि इमान्दारीपूर्वक आफ्नो दायीत्व निर्वाह गर्नुपर्ने बताए ।
कार्यक्रममा यूनिट्राभका महासचिव सुमनप्रसाद पराजुलीले पर्यटन क्षेत्रको दिगो विकासका लागि होटल, रेष्टुरेन्ट, ट्रेकिङ, ट्राभलमा काम गर्ने श्रमिकहरुले भावी दिनमा खेल्नुपर्ने भूमिका र उनीहरुको अधिकारका विषयमा कार्यपत्र पेश गरेका थिए ।
यस्तै नेस्वहोमयूका उपाध्यक्ष बंशी भट्टराईले ब्यवसायीहरुले ट्रेड युनियन संगठनलाई हेर्न दृष्टिकोण परिवर्तन गर्नुपर्ने भनाई राखे । कार्यक्रमका प्रमुख अतिथि जिफन्ट पर्यटन क्षेत्र युनियन परिषद्का संयोजक राम बुढाथोकीले सबै रेष्टुरेन्ट, होटल, क्याटरिङ, ट्रेकिङ, ट्राभल, र्याफ्टिङ, एयरलाइन्सका मजदुरहरुलाई संगठीत भएर कार्य गर्न आग्रह गर्दै अनुशासनमा रहेर आफ्नो दायीत्व पुरा गर्न निर्देशन दिएका थिए । यूनिट्राभ पश्चिमाञ्चल क्षेत्रीय कमिटीका अध्यक्ष विजय केसीको अध्यक्षतामा कार्यक्रम सम्पन्न भएको हो ।
१७ चैत २०७२, १२.००
वि.सं.२०७२ चैत १७ बुधवार १२:३३ मा प्रकाशित
