पोखरा । मनकामना केबुलकार पोखरा कप अन्तर्राष्ट्रिय फुटबल प्रतियोगिता यही चैत ३० देखि वैशाख ११ गतेसम्म पोखरा रङ्गशालामा सञ्चालन गरिने भएको छ ।
कास्की जिल्ला फुटबल सङ्घको आयोजना तथा मनकामना दर्शन प्रालिको मुख्य प्रायोजनमा सञ्चालित हुने सो प्रतियोगितामा नेपालका ए डिभिजनका १० फुटबल टोली र दुई विदेशी गरी १२ टोलीको सहभागिता रहनेछ ।
यसअन्तर्गत थ्री स्टार, मनाङ मस्र्याङ्दी क्लब, त्रिभुवन आर्मी क्लब, नेपाल पुलिस क्लब, नेपाल एपिएफ क्लब, झापा ११, धरान ११, रुपन्देही ११, सिमरा, पोखरा तथा बङ्गलादेश र भारतका १/१ टोली रहने सङ्घका अध्यक्ष धर्मबहादुर लामिछानेले आज बिहान यहाँ आयोजित पत्रकार सम्मेलनमा जानकारी दिनुभयो ।
प्रतियोगिताका विजेताले रु पाँच लाख पाँच हजार ५५५ र उपविजेताले रु दुई लाख ५५ हजार ५५५ नगद, पदक र सिल्ड पाउने छन् । मनकामना केबुलकार पोखरा कप प्रतियोगिता गत पुस ८ गतेदेखि आयोजना गर्ने भनिएकामा नाकाबन्दीका कारण असहज अवस्था सिर्जना भएकाले सारिएको सङ्घका उपाध्यक्ष मिलन गुरुङले जानकारी गराउनुभयो ।
पश्चिमाञ्चल क्षेत्रीय खेलकुद विकास समितिका अध्यक्ष खगराज पौडेलले प्रतियोगिता सञ्चालनका लागि राष्ट्रिय खेलकुद परिषद्काबाट रु एक लाख सहयोग गर्ने वचन दिनुभयो ।
१९ चैत २०७२, ९.००
वि.सं.२०७२ चैत १९ शुक्रवार १४:०७ मा प्रकाशित
