जापान । यहाँ फेरि अर्को भूकम्प आउने आशंकामा करिब साढे दुई लाख मानिसलाई सुरक्षित स्थानतर्फ जान आग्रह गरिएको छ । जापान रेडक्रस सोसाइटीले यो जानकारी दिएको हो ।
सोसाइटीका सल्लाहकार नाओकी कोकावाले सुरक्षित स्थानमा पठाइएका मानिसको हेरचाहका लागि मेडिकल टिमसमेत प्रस्थान गरिसकेको बताएका छन् । जापानको मौसम विज्ञान एजेन्सीले आगामी दिनमा भूकम्पका कयौं झड्का आउन सक्ने चेतावनी दिएको छ ।
गत साता जापानको क्युसु टापुमा आएको ७.३ रेक्टर स्केलको भूकम्पमा ४२ जनाको मृत्यु भएको थियो भने एक हजारभन्दा बढी घाइते भएका छन् । भूकम्पमा कयौं भवन, सडक र पुलमा भारी क्षति पुगेको छ । उद्धार र राहतमा ३ हजारभन्दा बढी मानिस खटिएका छन् । उता सुरक्षित स्थानमा पठाइएकाहरूले आफूहरूलाई खाना पनि कम दिइएको गुनासो गरेका छन् । यस्तै, पानीको पनि संकट भएको बताइएको छ । तर, प्रधानमन्त्री सिन्जो आवेले भूकम्प पीडितहरूलाई सरकारले पूरै ख्याल राखिरहेको बताएका छन् ।
७ बैशाख २०७२, १।००
वि.सं.२०७३ वैशाख ७ मंगलवार १५:४१ मा प्रकाशित
